Beijińdegi Olimpiada oiyndarynda fristail-mogýldan Qazaqstan namysyn alty sportshy qorǵaidy. Bul týraly komandanyń bas bapkeri Elena Krýglyhina málimdedi, dep habarlaidy Olympic.kz.
Halyqaralyq shańǵy sporty federatsiiasy (FIS) Qazaqstan komandasyna qosymsha kvota bóldi. Nátijesinde, Olimpiada oiyndarynda Qazaqstan atynan tórt áiel adam jáne eki er adam synǵa túsedi. Atap aitar bolsaq, Beijiń tórinde Iýliia Galysheva, Aiaýlym Ámirenova, Olesia Graýr, Anastasiia Gorodko, Dmitrii Reiherd jáne Pavel Kolmakovtyń ónerin tamashalaimyz.
«Bári biz qalaǵandai bolǵan joq. Biraq bul – sport. Kezdesken qiyndyqtarǵa qaramastan, sportshylar ózderin jaqsy qyrynan kórsetip, qysqy oiynda Qazaqstannyń básekelese alatynyn dáleldedi. Bizde erlerden eki, áielderden tórt kvota bar.
Azdaǵan qiynshylyqtar kezdeskenin atap óttim. Viza máselesine bailanysty AQSh-taǵy álem kýbogi kezeńine Anton Bondarev bara almady. Ol litsenziiaǵa qol sozym jerden toqtady. Jaraqatyna bailanysty Sergei Romanov Amerikaǵa bara alǵan joq, al Olen Tsinn joldamasyz qaldy.
Bizdiń elimizdiń namysyn Iýliia Galysheva, Aiaýlym Ámirenova, Olesia Graýr, Anastasiia Gorodko, Dmitrii Reiherd jáne Pavel Kolmakov qorǵaidy. Bul irikteý óte aýyr ótti, sondyqtan, sportshylardyń barlyǵyn da quttyqtaimyn.
Aita ketý kerek, sportshylar da, bapkerler quramy da tolyǵymen Óskemen qalasynyń ókilderi. Biz Qazaqstan atyn tanytý úshin bar kúshimizdi salamyz. Qazirgi tańda Olimpiada aldyndaǵy daiyndyqty Shymbulata ótkizip jatyrmyz», - dedi bas bapker.
