Beijińde 4-20 aqpan aralyǵynda ótetin Qysqy Olimpiadada Ulttyq ulannan 6 sportshy el namysyn qorǵaidy, dep habarlaidy QazAqparat.
QR Ulttyq ulany «Batys» óńirlik qolbasshylyǵy baspasóz qyzmetiniń jetekshisi, podpolkovnik Erbolat Sultanovtyń málim etkenindei, biatlonnan aǵa leitenant Galina Vishnevskaia-Sheporenko men qatardaǵy jaýynger Aleksandr Mýhin synǵa túsedi.
Olimpiadanyń ashylý saltanatynda shorttrekshi Abzal Ájiǵalievpen birge Qazaqstannyń kók bairaǵyn ustap shyǵatyn efreitor Ekaterina Aidova konki sportynan úsh qashyqtyqta óner kórsetedi.
Fristaildan aǵa leitenant Iýliia Galysheva men kishi serjant Dmitrii Reiherd, akrobatikadan qatardaǵy jaýynger Janbota Aldabergenovaǵa senim artylyp otyr.
2018 jylǵy Olimpiadanyń qola júldegeri Iu.Galysheva – Qazaqstannyń basty úmitteriniń biri. Ol erteń irikteý saiysyna qatysady.
Olimpiadashylarǵa QR Ulttyq ulany sporttyq komandasyn daiarlaý ortalyǵynyń bas bapkeri, polkovnik Sátjan Ábishev sáttilik tiledi.
«Olimpiada oiyndarynda eshkimge de jarys jeńil timeidi. Sondyqtan sportshylarǵa barlyq sheberlikterin kórsete bilip, jankúierlerin qýantýǵa tilektestik bildiremiz», - dedi S.Ábishev.
