Livan astanasy Beirýt portta bolǵan eki jarylys saldarynan 78 adam qaza taýyp, 4 myńnan astam adam jaraqat alǵan, qalanyń birneshe aýdany tolyqtai qiraǵan. Bilik málimdemesine sáikes, ammonii nitratynyń úlken partiiasy (ammiak selitrasy dep te atalaidy) portta uzaq ýaqyt qaýipsizdik sharalarynsyz saqtalǵannan keiin jarylǵan, dep habarlaidy VVS.
Jarylystyń kóptegen kýágerleri áleýmettik jelilerde porttyń ústinde aldymen tútini kórinip, sodan keiin joiqyn jarylys bolǵany, keiinnen qalany sańyraýqulaq tárizdi bult basqany túsip qalǵan kadrlardy jariialady. Jarylys tolqyny kóptegen ǵimarattardy, sonyń ishinde porttan birneshe shaqyrym qashyqtyqta ornalasqan nysandardy da qiratyp, kólikterge de ziian keltirgen. Jergilikti buqaralyq aqparat quraldarynyń habarlaýynsha, zardap shekkenderdiń sany áli artýy múmkin, óitkeni adamdar ǵimarat qirandylarynyń astynda qalǵan.
Bi-bi-si tilshisi oqiǵa ornynan Beirýt portyna qatty zaqym kelgenin jáne onyń áli jumys istemeitinin habarlaidy.
«Jaqyn mańdaǵy barlyq ǵimarattar qirady. Maǵan qarańǵyda áinekter men olardyń synyqtarynyń ústimen júrýge týra keldi», - dedi kýágerlerdiń biri Frans press agenttigine.
Jarylystyń kúshti bolǵany sonshalyq, ol Beirýttan 240 shaqyrym jerde ornalasqan Jerorta teńiziniń Kipr aralyna da estilgen. Livan Qyzyl Kresti Beirýttaǵy aýrýhanalardyń adamǵa tolyp ketkenin habarlady.
Livan prezidenti Mishel Aýn elde úsh kúnge sozylatyn aza tutý kúnin jariialady. Sondai-aq oqiǵanyń saldaryn joiý úshin 100 milliard lira (66 millionAQSh dollary) bólýge ýáde berdi. Beirýt apat aimaǵy dep jariialandy. Al bilik áskerdi qaýipsizdik úshin paidalaný quqyǵyn aldy.
Eske sala keteiik, 4 tamyzda Livannyń áskeri-teńiz kúshteri (ÁTK) bazasyna jaqyn Beirýt porty aýdanynda joiqyn jarylys boldy.
Jaralys saldarynan Qazaqstannyń SIM Livandaǵy Qazaqstannyń diplomatiialyq missiiasy ǵimaratyna ziian kelgen.
Jarylys kezinde diplomatiialyq missiianyń qyzmetkerleri jumys kúni aiaqtalǵannan keiin jumys ornynan ketip qalǵan. Konsýl jumysta qalǵan bolatyn jáne jarylys tolqyny saldarynan jeńil jaraqat aldy.
Buǵan deiin habarlaǵandai, 5 tamyz kúni Beirýt ýaqytymen saǵat 00:30-da Livannyń Densaýlyq saqtaý ministri Muhammed Hasan jarylystan qaza tapqandar sany 70-ke jetkenin, 4 myńǵa jýyq turǵyn jaraqat alǵanyn málimdedi.
Álem elderiniń, halyqaralyq uiymdardyń basshylary men premer-ministrleri 4 tamyzda Livannyń áskeri-teńiz kúshteri (ÁTK) bazasyna jaqyn Beirýt porty aýdanynda bolǵan jarylysqa bailanysty Livan halqyna kóńil aityp, shuǵyl kómek kórsetýge daiyn ekenin bildirdi.
