Foto: videodan skrinshot
Aqtóbede poiyz bastyǵyn vokzalda pyshaqtap óltirgen jigitke qatysty sot bastaldy. 28 jastaǵy sottalýshy qylmysyn saiabaqtaǵy beinekameraǵa qarap turyp istegen, dep habarlaidy Ult.kz KTK arnasynyń jańalyqtaryna silteme jasap.Aiyptalýshy isti alqa bilerdiń qaraǵanyn qup kórdi. Búgin alqa biler tolyq iriktelip, oqiǵanyń mán-jaiymen tanysty. Qandy oqiǵa osydan úsh ai buryn bolǵan. Poiyz bastyǵy sol kúni demalysqa shyqqan. Vokzal aldyndaǵy gúlzarda kele jatqanda aldynan jigit shyǵyp, shylym suraidy. Temeki bermegen soń, sol jerde alty ret pyshaq suǵyp alǵan. Vokzal aýmaǵyndaǵy beinekameraǵa qarap qoiyp, pyshaqtaǵy qandy súrtip, óz jónine kete barypty. 28 jastaǵy kúdikti buǵan deiin sottalyp, probatsiia baqylaýynda júrgen. Endi buryn jasaǵan qylmysyna taǵy jaza qosylady. Biraq sotta ol bir ret pyshaq suqtym dep aqtalmaqshy boldy. Sondai-aq jábirlenýshi tarap qandy qylmysqa ózge adamdardyń da qatysy bar ekenine senimdi.
«Ustalǵan azamat bir-aq jerden pyshaqtadym deidi. Al meniń aǵam alty jerden pyshaqtalyp otyr. Ol moiyndap otyr, bir-aq jerden pyshaq suqtym, keńse pyshaǵy deidi. Keńse pyshaǵynan adam ólmeidi ǵoi. Men jaza emes, qasynda óltirgen adamnyń tabylýyn talap etemin. Óletin aǵam ólip qaldy. Búgin sottalyp, erteń qaityp kelgeni kerek joq. Naǵyz qylmyskerler tabylyp, ádil jazasyn alsa eken deimin»,- deidi marqumnyń qaryndasy Merýert Muhambetalina.
