Beibit jiyn uiymdastyrý tártibi týraly zań jobasy ultty biriktiretin qujat bolýy tiis. Mundai pikirdi Ulttyq qoǵamdyq senim keńesiniń múshesi Erlan Sairov aitty, dep habarlaidy QazAqparat.
«Eń aldymen osylai ústel basyna jinalyp otyrǵanymyzdyń ózi qýantady. Óitkeni, osy jerde ministrliktiń de, azamattyq qoǵamnyń da ókilderi otyr. Osynyń ózi ulttyq ymyranyń bastalǵanyn kórsetedi. Ekinshiden, bul zań negizinde progress sanalady. Biraq, ishinde kóptegen ártúrli suraqtar bar. Dialog detaldy ashady demekshi, onyń detaldaryn qarastyrý kerek», - dedi ol «Qazaqstan Respýblikasynda beibit jiyndar, sherý, piketter, demonstratsiialyq jinalystardy ótkizý men uiymdastyrý tártibi týraly» zań jobasyn qoǵamdyq tyńdaý barysynda.
Osy rette ol atalǵan zań jobasyn aqyldasyp, oi-pikirlerdi ortaǵa salyp, sodan keiin baryp barlyq tarap ymyraǵa kelgen qujatty qabyldaý qajettigin basa aitty.
«Biz soǵan qarai kele jatyrmyz. Sondyqtan osyndai kezdesýler qajet ári jii ótýi tiis. Syn da kerek. Óitkeni, syn bolmasa memlekettik organdar ornynan qozǵalmaityny ras. Al endi zań jobasy Parlamentke jetken kezde de ol jerde belgili bir top bolýy kerek dep oilaimyn. Ol topqa halyqaralyq deńgeidegi sarapshylar kirýi tiis. Bul zań ultty, memleketti biriktiretin qujat bolýy tiis», - dedi Erlan Sairov.
