بەيبٸت جيىن ۇيىمداستىرۋ تەرتٸبٸ تۋرالى زاڭ جوباسى ۇلتتى بٸرٸكتٸرەتٸن قۇجات بولۋى تيٸس. مۇنداي پٸكٸردٸ ۇلتتىق قوعامدىق سەنٸم كەڭەسٸنٸڭ مٷشەسٸ ەرلان سايروۆ ايتتى, دەپ حابارلايدى قازاقپارات.
«ەڭ الدىمەن وسىلاي ٷستەل باسىنا جينالىپ وتىرعانىمىزدىڭ ٶزٸ قۋانتادى. ٶيتكەنٸ, وسى جەردە مينيسترلٸكتٸڭ دە, ازاماتتىق قوعامنىڭ دا ٶكٸلدەرٸ وتىر. وسىنىڭ ٶزٸ ۇلتتىق ىمىرانىڭ باستالعانىن كٶرسەتەدٸ. ەكٸنشٸدەن, بۇل زاڭ نەگٸزٸندە پروگرەسس سانالادى. بٸراق, ٸشٸندە كٶپتەگەن ەرتٷرلٸ سۇراقتار بار. ديالوگ دەتالدى اشادى دەمەكشٸ, ونىڭ دەتالدارىن قاراستىرۋ كەرەك», - دەدٸ ول «قازاقستان رەسپۋبليكاسىندا بەيبٸت جيىندار, شەرۋ, پيكەتتەر, دەمونستراتسييالىق جينالىستاردى ٶتكٸزۋ مەن ۇيىمداستىرۋ تەرتٸبٸ تۋرالى» زاڭ جوباسىن قوعامدىق تىڭداۋ بارىسىندا.
وسى رەتتە ول اتالعان زاڭ جوباسىن اقىلداسىپ, وي-پٸكٸرلەردٸ ورتاعا سالىپ, سودان كەيٸن بارىپ بارلىق تاراپ ىمىراعا كەلگەن قۇجاتتى قابىلداۋ قاجەتتٸگٸن باسا ايتتى.
«بٸز سوعان قاراي كەلە جاتىرمىز. سوندىقتان وسىنداي كەزدەسۋلەر قاجەت ەرٸ جيٸ ٶتۋٸ تيٸس. سىن دا كەرەك. ٶيتكەنٸ, سىن بولماسا مەملەكەتتٸك ورگاندار ورنىنان قوزعالمايتىنى راس. ال ەندٸ زاڭ جوباسى پارلامەنتكە جەتكەن كەزدە دە ول جەردە بەلگٸلٸ بٸر توپ بولۋى كەرەك دەپ ويلايمىن. ول توپقا حالىقارالىق دەڭگەيدەگٸ ساراپشىلار كٸرۋٸ تيٸس. بۇل زاڭ ۇلتتى, مەملەكەتتٸ بٸرٸكتٸرەتٸن قۇجات بولۋى تيٸس», - دەدٸ ەرلان سايروۆ.
