Elimizde talqylanyp jatqan beibit jiyndar týraly zań jobasy qoǵamnyń damýy bir qadam alǵa jyljyǵanyn kórsetedi. Bul týraly «Shymkent qalasynyń Azamattyq Aliansy» qaýymdastyǵynyń tóraǵasy Jumaǵali Bilisbekov aitty, dep habarlaidy QazAqparat tilshisi.
«Búgingi zań jobasynyń burynǵysynan ereksheligi, ár túrli mitingke shaqyrǵan kisilerdiń quqyqtary men oǵan qatysýshylardyń qaýipsizdigin qamtamasyz etý qarastyrylǵan. Jergilikti turǵyndarǵa da ziian keltirmeý siiaqty máseleler de qaralǵan. Degenmen miting ótkizemin deýshilerdiń ótinishin qabyldaityn, olarǵa jaýap beretin bir ókiletti organ qurý kerek dep esepteimin. Ol organ quramynda qoǵam qairatkerleri, qoǵamdyq keńes músheleri, úkimettik emes uiymdardyń ókilderi bolǵany durys. Top musheleri birge aqyldasa otyryp, mitingke shyqqysy keletinderdiń máseleleri qandai alańda, qandai deńgeide talqylanýy kerektigin anyqtai alady»,- deidi Jumaǵali Bilisbekov.
Qaýymdastyq tóraǵasy zań jobasyna qatysty usynystaryn da bildirdi.
«Zań jobasynda miting ótkizetin tulǵalardyń jaýapkershiligin aldyn ala belgilep alý kerek. Sondai-aq qala turǵyndarynyń qaýipsizdigin qamtamasyz etý, jol erejesin buzbaý, infraqurylym men sanitarlyq normalardy saqtaýdy engizý qajet. Biz qaýymdastyq tarapynan óz usynystarymyzdy joldadyq»,- deidi Jumaǵali Bilisbekov.
