Jańa zań jobasy bilik pen halyq arasyndaǵy bailanysty nyǵaitady. Bul týraly Kókshetaýda ótken «Qazaqstan Respýblikasynda beibit jiyndar, sherý, piketter, demonstratsiialyq jinalystardy ótkizý men uiymdastyrý tártibi týraly» zań jobasy talqylanǵan dialogtyq alańda «Qazaq tili men mádenieti» qoǵamdyq birlestiginiń tóraǵasy Meirambek Qiyqov aitty, dep habarlaidy QazAqparat.
«Memleket basshysynyń «Halyq únine qulaq asatyn memleket» tujyrymdamasy qalyń el tarapynan qoldaý tapqan bolatyn. Iaǵni, oǵan sáikes, bilik buqaraǵa barynsha jaqyn bolýy kerek. Sheneýnikter aldyna kelgen adamǵa shekesinen qaramai, qaita máselesin sheship berýge umtylýy tiis. Bilik turǵyndardyń áleýmettik, turmystyq máselelerin qordalandyrmai shuǵyl sheshýi kerek. Másele sheshilmegendikten halyqtyń kóshege shyǵýyna týra keledi», - dedi jiynǵa qatysqan «Qazaq tili men mádenieti» qoǵamdyq birlestiginiń tóraǵasy Meirambek Qiyqov.
Sonymen qatar, ol demokratiialyq baǵyt ustanǵan el úshin halyq muń-muqtajyn bilikke zańdy jolmen jetkize alatyn beibit jiyndar týraly zańnyń bolǵanyn qoldap otyr.
«Eger bilik halyqtyń áleýmettik, turmystyq máselelerin jedel sheship otyrsa, onda halyqtyń bilikke degen senimi artyp, mitingtiń de sany az bolar edi. Degenmen, el bolǵan soń másele bolmai turmaidy. Árine, demokratiiaǵa aiaq basqan el úshin mundai zańnyń bolǵany durys. Osy zań arqyly bilik pen halyq arasyndaǵy bailanys nyǵaia túsedi dep esepteimin», - dep tolyqtyrdy Meirambek Qiyqov.
Aita keteiik, búgin Kókshetaýda Qazaqstan Respýblikasy Aqparat jáne qoǵamdyq damý ministrliginiń jaýapty hatshysy Janat Qojahmetovtiń qatysýymen beibit jiyndar týraly zań jobasyn qoǵamdyq talqyǵa salǵan dialogtyq alań uiymdastyryldy.
Sharaǵa jergilikti qoǵamdyq birlestik tóraǵalary, úkimettik emes uiymdar men partiia filialdarynyń belsendileri, kásipodaqtar jáne buqaralyq aqparat quraldary ókilderi qatysty.
