Qaraǵandy qalasyndaǵy «Dostyq úiinde» Aqparat jáne qoǵamdyq damý ministri Dáýren Abaevtyń qatysýymen dóńgelek ústel otyrysy ótti. Onda «Qazaqstanda beibit jinalystar uiymdastyrý jáne ótkizý tártibi týraly» QR Zańynyń jobasy talqylandy, dep habarlaidy "Ult aqparat".
Kezdesýge qoǵam qairatkerleri, saiasi partiianyń, qoǵamdyq birlestikterdiń, kásipodaq uiymdarynyń ókilderi, sondai-aq Qaraǵandy oblysynyń zańgerleri, jýrnalisteri, memlekettik organdar ókilderi qatysty. Zań jobasyn talqylaýǵa Qaraǵandy oblysyna arnaiy kelgen Aqparat jáne qoǵamdyq damý ministri Dáýren Abaevqa olar óz usynystaryn bildirdi.
«Mundai qoǵamdyq tyńdaýlar tek Nur-Sultan men Almatyda ǵana emes, Pavlodar, Petropavl, Kókshetaý, Oral, Óskemen jáne Shymkent qalalarynda ótkizildi. Jobanyń tolyq mátini egov.kz saityna ornalastyryldy, barlyq tilek bildirýshiler onymen tanysty. Qazir biz qazaqstandyqtar da, Memleket basshysy da kelispeitin keibir normalardy bastapqy nusqadan alyp tastadyq. Mysaly, onyń tapsyrmasy boiynsha zańnan 250-den astam adam qatysqan beibit jinalystar ruqsat berý sipatynda bolýy tiis degen norma alyp tastaldy. Endi jobada barlyq jinalystardyń qatysýshylar sanyna qaramastan habarlama sipatynda bolýy týraly sóz bolyp otyr. Iaǵni, miting ótkizý úshin ruqsat alýdyń qajeti joq, tek jergilikti atqarýshy organdarǵa habarlama jiberý kerek», - dedi Dáýren Abaev.
Sondai-aq, ministr jinalysty ótkizýge ruqsat berilgen oryndar shetki jerlerde emes, infraqurylymy damyǵan oryndarynda ornalasatynyn atap ótti.
Taǵy bir jańalyq, zań jobasynda beibit jinalystarǵa 18 jasqa tolmaǵan tulǵalar qatysa alatyny týraly jazylǵan.
«Buryn 18 jastan joǵary bolýy tiis degen shekteý bolǵan. Shynymdy aitsam, biz bul shekteýdi alyp tastaǵymyz kelgen joq. Biraq alyp tastaýǵa májbúr boldyq, sebebi bul Qazaqstan bekitken Bala quqyqtary týraly Konventsiianyń talaby, onda balanyń beibit jinalystar bostandyǵyna quqyǵy tanylady. Osylaisha, 18 jasqa deiingi azamattarǵa beibit jinalystarǵa qatysýǵa ruqsat berildi», - dedi ministr.
Qoǵamdyq tyńdaý kezinde qaraǵandylyqtar beibit jinalystar kezinde politseilerdiń quqyqtary men mindetterin egjei-tegjeili túsindirýdi surady.
«Meniń oiymsha, politseilerdiń qyzmetin reglamentteý qajet. Eger olar miting ótkizý ornynda qyzmet atqarsa, qandai jaǵdailarda olar kúsh qoldana alady, al qandai jaǵdailarda qoldanbaýlary tiis ekenin túsindirgen jón. Is-qimyl standarttary bolýy tiis», - deidi QR IIM Qaraǵandy akademiiasynyń aǵa oqytýshysy Oksana Ladygina.
Halyq qalaýlylary bul zań jobasy «halyq únine qulaq asatyn memleketti» qurýǵa septigin tigizetin bolady dep esepteidi.
«Men aitqym keletini, Qasym Jomart Kemeluly óziniń sońǵy joldaýynda «halyq únine qulaq asatyn memleketti» qalyptastyrý kerektigin aitty. Osy joldaý negizinde elimizdegi mitingiler jónindegi zańdardy qaita qarap, ony zańdastrý máselesin tapsyrǵan bolatyn. Búgin, mine, osyǵan bailanysty ministrdiń qatysýymen úlken keleli kezdesýde osy máseleler jalpy Qaraǵandy oblysynyń qoǵam belsendilerimen, qoǵam qairatkerleriniń qatysýymen erekshe talqylandy. Bul zań 1995 jyly qabyldanǵan bolatyn. Osy 25 jyl ishinde bul zań moraldyq jaǵynan da, basqa turǵydan da eskirgen. Ony jańadan qaita qabyldaýdy ýaqyttyń ózi talap etip otyr. Jalpy mitingi degenimizdiń ózi halyqtyń eń sońǵy, esh nársege múmkindigi bolmaǵan ýaqytta narazylyǵyn alyp baratyn eń sońǵy sharalardyń biri dep qabyldaý kerek. Al meniń oiymsha, halyq únine qulaq asatyn memleket bolǵan jaǵdaida biz bul mitingilerge jetkizbeitin deńgeide jumys jasaýymyz kerek dep esepteimin», - dep atap ótti oblystyq máslihattyń depýtaty Bekzat Altynbekov.
Aqparat ministriniń aitýynsha, joba mátini elektrondyq úkimet portalynda ornalastyrylǵannan keiin oǵan pikir jazýshylar men ony qaraý sany rekordtyq deńgeige jetken.
