Foto: instagram.com/beibutshumenov
Kásipqoi boksshy Beibit Shúmenov Astanadaǵy oiyn-saýyq ortalyqtarynyń birinde bolǵan oqiǵaǵa qatysty TengriSport saityna suhbat berdi, dep habarlaidy Tengrinews.kz.
Aita keteiik, buǵan deiin sportshynyń qolynda balasy bar er adamdy soqqyǵa jyqqan videosy jelide tarap, qoldanýshylardyń narazylyǵyn týdyrǵan edi. Al ol oqiǵa qalai bastalǵany jaily boksshynyń ózi basqasha baiandaidy. Qazirgi tańda bul iske qatysty jábirlenýshi tarap aryz jazǵan. Astana Politsiia departamenti Qylmystyq kodekstiń 293-baby "Buzaqylyq" boiynsha tergeý júrgizilip jatqany týraly habarlady.
39 jastaǵy sportshy oqiǵa balalardyń kelispei qalýynan jáne ákesiniń dóreki jaýap qatýynan bastalǵanyn baiandaǵan.
"Men ulymdy Qazaqstanǵa alyp kelgenmin, ol – AQSh azamaty. Ol Otanyna kelip, osynda qydyryp qaitsa dep kelgenbiz. Biz Mega Silkway oiyn-saýyq ortalyǵyna bardyq, ol Happylon-da oinaǵandy unatady. Odan keiin ekinshi qabatyna kóterilip, tamaqtanyp almaq boldyq. Onda balalar oinaityn jeri boldy.
Balam oinaýǵa ketken, azdan soń ony bireý urǵanyn aityp shaǵymdanyp keldi. Bir bala arqasynan uryp, aiaǵynan súiregen. Meniń ulym eshteńe túsinbegen, Amerikada mundaidy múlde kórmegen. Onyń jasy 8-de, biz onymen dosy sekildi sóilesemiz. Oǵan eshqashan daýys kótermegenbiz, sondyqtan da qatty qoryqqan bolar.
Azdan soń ol bala qaita kelip ulymdy basynan ura bastaǵan, qashyp úlgergen. Odan keiin ulym ony ákesi alyp ketkenin aitty. Al onyń janynda taǵy bir kishkentai balasy boldy", - deidi Beibit Shúmenov.
Sportshynyń aitýynsha, pyshaq alyp umtylǵannan keiin baryp ashýǵa býlyqqan. Al oǵan deiin dóreki jaýap qatqany shamyna tigen.
"Men oǵan kelip, seniń balań ba urǵan dep suradym. Al ol "iá, ne istei alasyń?" dedi. Men mundaidy kútpedim. Oǵan jaqyndap "ne aityp turǵanyńdy bilesiń be?" degende, ol qolyna ilingen zatpen umtyldy. Keiinnen qolyndaǵy pyshaq emes ekenin uǵynyp, aýystyryp qaita urýǵa tyrysty.
Maǵan "onyń qolynda pyshaq bar" dep aiqailady. Ol kishkentai balany tastamai, qorǵaný úshin paidalandy. Men ony artynan ustap, kishkentaiyn qolynan bosattyrýǵa tyrystym. Ol balany jibergen joq, qaita ony qalqan retinde paidalandy. Qandai áke mundai qadamǵa barady? Eger meniń otbasymda sondai jaǵdai bolsa, olardy qorǵaǵan bolar edim. Videoda bári kórinip tur. Pyshaqty kórip, ony qolynan alyp tastaýǵa tyrystym. Politsiia kelip, biz sosyn bólimshege bardyq", - deidi boksshy.
Sondai-aq ol politsiiamen bolǵan dialog týraly aityp, oqiǵanyń taǵy bir qatysýshysy baryn málimdegen.
"Biz bólimshege barǵannan keiin onyń Qazaqstanda zańsyz júrgeni málim boldy. Ol Qyrǵyzstan azamaty eken. Al onyń balany qolynan nege tastamaǵanyn sonda túsindim. Bala óziniki emes bolyp shyqty. Al ony qorǵaný úshin paidalanǵan.
Videony durystap qarasańyz, qolyna bir zatty alyp, keiinnen onyń pyshaq emesin bilip tastai salady. Balany tastai salyp pyshaqty qolǵa alyp, maǵan umtyldy. Deni saý adam osylai jasai ma?" – deidi boksshy.
Politsiia bólimshesinde Beibit balalardyń anasymen sóilesken.
"Eki balanyń anasy taza aǵylshyn tilinde sóileidi eken. Ol menen, áielimnen jáne ulymnan keshirim surady. Ulynyń minezin aityp, aýtizmmen aýyratynyn da jetkizdi. Esil aýdandyq politsiia bólimindegi kamerada bári jazylǵan.
Videoda bizdi ajyratpaq bolǵan taǵy bir er adam bar. Aq jeidede boldy. Onyń esimi – Ǵani. Ol Bolat Temirovtiń (jeńil salmaqta KSRO, TMD chempiony) inisi. Bul isti sol ýshyqtyryp jatyr dep oilaimyn.
Basynda ol maǵan aryz jazbaq bolǵan. Qasyndaǵylar tynyshtandyrǵan edi. Men oǵan shabýyldaǵan joqpyn, qaita maǵan basqa eldiń azamaty pyshaqpen umtyldy. Ǵanidyń nieti basqa, jáne sonyń advokaty jumys istep jatqan siiaqty", - deidi Shúmenov.
Boksshynyń áieli de aryz jazǵan. Beibittiń aitýynsha, Qyrǵyzstan azamaty ony oqiǵa kezinde iterip jibergen. Qoly kógerip qalǵan.
"Er adam ózi úshin emes, balasyna aiqailaǵany úshin mundai áreketke barǵany jaily aitady. Videoda meniń balamdy urǵan úlkeni joq. Onyń qolyndaǵy ana áieldiń kishkentaiy bolatyn.
Men onymen jai sóilesýge barǵanmyn, al onyń jaýaby tańǵaldyrdy. Ol qolyna tamaqtanatyn quraldy alǵanda da urǵan joqpyn, ony ustap qalýǵa tyrystym. Balany jibergenin kúttim. Videoda onyń pyshaqty qalai alǵany kórinip-aq tur.
Ekinshi videoda onyń synǵan bótelkeni qolyna alǵanyn kórýge bolady. Ony sosyn tastai salady. Meniń mindetim otbasymdy qorǵaý. Men onyń anaý áielmen birge turyp elimizde zańsyz júrgenin resmi túrde málimdeimin.
Men qarapaiym adammyn, jurt nazaryna túse bergim kelmeidi. Mende shyǵar jol joq, sondyqtan da bul suraqtarǵa jaýap berdim. Internette áńgime kóp aitylyp jatyr, úshinshi tarap osydan haip jasaǵysy keledi. Eshbir áke óz balasyn qalqan retinde paidalanbaidy.
Men balaǵa eshqashan daýys kótermegen bolar edim. Olar perishte ǵoi, sondyqtan da men ony ata-analaryna túsindirgim kelgen. Bulai bolaryn kim bilgen.
Oqiǵadan keiin politsiia bólimshesinde balalardyń anasymen beibit kúide tarastyq. Al endi bul oqiǵaǵa úshinshi bir taraptyń qyzyǵýshylyǵy oianǵan sekildi", - deidi Beibit Shúmenov.
Aita keteiik, Beibit Shúmenov – tanymal qazaqstandyq kásipqoi boksshy. Mansabyn 2007 jyly bastaǵan. 19 jekpe-jek ótkizip, 17-de jeńiske jetken. 2 kezdesýinde qarsylasyna ese jibergen. 2017 jyly jaraqatyna bailanysty mansabyn aiaqtaǵan.
video: egovpress
