Foto: Aqorda
Prezident jinalǵan qaýymdy Meditsina qyzmetkeri kúnimen quttyqtap, osy merekege orai dárigerlermen Aqordada alǵash ret kezdesip otyrǵanyn ári bul jiynnyń mán-maǵynasy erekshe ekenin atap ótti, dep habarlaidy Ult.kz.
Prezident barsha meditsina mamandaryna zor rizashylyǵyn bildirip, olardy eń qadirli mamandyq ieleri dep atady.
"Meditsina qyzmetkerleri – ult saýlyǵynyń saqshylary, eń qadirli mamandyq ieleri. Ásirese, jahandyq indet, iaǵni, kovid kezinde búkil el dárigerlerdiń adal qyzmetine kýá boldy. Kúrdeli kezeńde meditsina mamandary myńdaǵan adamdy qutqaryp qaldy. Biz abzal jandardyń tabandy eńbegin baǵalaimyz. Dárigerler ota kezinde, aýrýhana palatasynda kún saiyn erlik jasaidy desek, artyq bolmaidy. Jedel járdem kóliginde adam ómirine arasha túsetin sátter bolady. Sondyqtan sizder, qurmetti meditsina qyzmetkerleri, beibit kúnniń batyrlary degen atqa laiyqsyzdar. Men barsha meditsina mamandaryna zor rizashylyǵymdy bildiremin, – dedi Memleket basshysy.
Qasym-Jomart Toqaev qazaq dárigerleri qai kezde bolsyn, el múddesin bárinen biik qoia bilgenin, ult qairatkerleri Halel Dosmuhamedov pen Sanjar Asfendiiarovtyń belgili dáriger bolǵanyn, olar halqymyzdyń azattyǵy úshin de, saýlyǵy úshin de aianbai kúreskenin atap ótti.
"Búginde elimizdiń densaýlyq saqtaý salasynda 380 myńǵa jýyq adam jumys isteidi. Ár mamannyń eńbegi orasan zor. Ult saýlyǵyn saqtaýǵa búkil ómirin arnaǵan tutas áýletter bar. Almatydaǵy Djývashevter áýletinen 13 adam meditsina salasyn tańdaǵan. Olardyń jalpy eńbek ótili – 375 jyl. Al Atyraý oblysyndaǵy Shanaevtar áýletinen 16 dáriger shyqqan. Mundai eńbek dinastiialarynyń ǵibratty joly – kópke úlgi-ónege. Qazir ulttyq meditsina salasy qarqyndy damyp kele jatyr. Jetistikterimiz az emes. Elimizde ortasha ómir súrý uzaqtyǵy 75,4 jasqa jetti. Ana men bala ólimi shamamen 12 paiyzǵa azaidy. Bes jylda 800-ge jýyq densaýlyq saqtaý nysany, iaǵni, kóptegen emhana men aýrýhana salyndy. Bul jumys toqtamaidy, memleket aldaǵy ýaqytta da infraqurylymdy damyta beredi. Ult saýlyǵyn jaqsartý alǵashqy meditsinalyq kómekten bastalady. Elimizde aýyldyq jerdegi meditsina júiesin jańǵyrtýǵa arnalǵan ulttyq joba júzege asyrylyp jatyr. Búginde 469 ǵimarat boi kóterdi. Jyl sońyna deiin taǵy 186 nysan salynady. Aýdandyq aýrýhanalar zamanǵa sai quraldarmen jabdyqtalyp jatyr", – dedi Prezident.
