Belgili ánshi Baqtiiar Tailaqbaev Almatydaǵy “Shveitsariia” turǵyn úi kesheninen páter alýǵa 30–40 million teńge jumsaǵanymen, bes jyldan beri baspanasyna qol jetkize almai keledi, dep habarlaidy ult.kz.
Óner iesi ózge de úleskerlermen birge ákimdik aldyna baryp, qurylysy aiaqtalmaǵan úilerdiń máselesin sheshýdi talap etken. Jinalǵandardyń arasynda úsh qurylys kompaniiasyna qarajat quiyp, páterin jyldar boiy kútip júrgen azamattar bar.
Miras Green Technology Building kompaniiasy salýǵa tiis turǵyn úi keshenine 150-ge jýyq adam shamamen 3 milliard teńge salǵan. Alaida olar áli kúnge deiin qonys toiyn toilai almaǵan. “Amadeýs Hotel Grýpp” kompaniiasynyń Pine Hill jáne Sky Club keshenderinen baspana almaq bolǵan 60-qa jýyq úlesker de bes jyldan astam ýaqyttan beri páterin kútip júr.
Aita keteiik, Dariǵanyń burynǵy kúieýi shańyraǵy ne úshin shaiqalǵanyn aitty.
Baqtiiar Tailaqbaev kim?
Baqtiiar Tailaqbaev - qazaq estradasynyń belgili ánshisi, Qazaqstannyń eńbek sińirgen ártisi. Ol 1959 jyly 8 sáýirde Qyzylorda oblysynda dúniege kelgen. Alǵashqy joǵary bilimin Jambyl gidromeliorativti-qurylys institýtynyń Qyzylorda bólimshesinde alǵan. 1983 jyly “Gúlder” ansamblinde óner kórsete bastaǵan. Keiin “Qazaqkontsert” birlestiginde eńbek etken.
Ánshi 1993 jyly Gnesinder atyndaǵy Resei mýzyka akademiiasyn estradalyq vokal jáne estrada rejissýrasy mamandyǵy boiynsha úzdik bitirgen. Óner jolynda Iosif Kobzonnan tálim alǵan. 1984 jyly Máskeýde ótken “S pesnei po jizni” búkilodaqtyq televiziialyq baiqaýynda bas júldeni jeńip alǵan. 1995 jyly “Daryn” memlekettik jastar syilyǵynyń laýreaty atanǵan. Sondai-aq Kairdegi halyqaralyq festival men “Aziia daýysy” baiqaýynda júldege ie bolǵan.
Baqtiiar Tailaqbaev oryndaýshylyqpen qatar shyǵarmashylyq ujymdarǵa jetekshilik etken. Almaty oblystyq filarmoniiasy janyndaǵy “Naýryz” ansambliniń kórkemdik jetekshisi bolǵan. Onyń repertýarynda qazaq jáne shetel kompozitorlarynyń ánderi bar. Óner iesi jas ánshilerdi tárbieleýge de atsalysyp, olardyń úlken sahnaǵa shyǵýyna qoldaý kórsetken.
