QR Syrtqy ister ministri Beibit Atamqulov Kipr Respýblikasynyń biznesmenderin Qazaqstanda jumys isteýge shaqyrdy, dep habarlaidy QazAqparat tilshisi.
«Kiprlik kompaniialardy qazaqstandyq áriptesterimen keńirek jumys júrgizýge shaqyramyz. Qazaqstanda jaily ári investitsiialyq tartymdy klimat qalyptasqan. Eýraziialyq ekonomialyq odaqqa múshe elmiz. Qazaqstanda qazirgi tańda kiprlik kapitaly bar 207 kompaniia tirkelgen», - deidi Beibit Atamqulov Kiprdiń Syrtqy ister ministri Nikos Hristodýlidispen kezdesý barysynda.
SIM málimetine súiensek, kiprlik kásipkerler elimizde negizinen paidaly qazbalardy óndirý, saýda, qurylys, kóliktik-ekspeditorlyq jáne qarjylyq salada eńbek etýde.
«Saýda, investitsiia, energetika, aýyl sharýashylyǵy salasynda yntymaqtastyqty nyǵaitýdyń zor múmkindikteri bar. Kipr biznes-baza retinde Qazaqstannyń strategiialyq ornalasýyn eskere otyryp, eki elge de tiimdi jumys júrgize alady», - dedi óz kezeginde Nikos Hristodýlidis.
Eske sala ketsek, elordada búgin QR Syrtqy ister ministri Beibit Atamqulov Kiprdiń Syrtqy ister ministri Nikos Hristodýlidispen kezdesip, eki eldiń yntymaqtastyǵynyń mańyzdy máseleleri talqylaǵan bolatyn.
