QR Syrtqy ister ministri Beibit Atamqulov Germaniiaǵa resmi saparmen bardy, dep habarlaidy "Ult aqparat" SIM baspasóz qyzmetine silteme jasap.
Qazaqstan men Germaniia aldaǵy ýaqytta sapaly jańa deńgeige shyǵa alatyn memleketaralyq qatynastardyń barlyq kesheni boiynsha kóp josparly seriktestikti arttyrýǵa niettenip otyr. Mundai nátijelerge QR Syrtqy ister ministri Beibit Atamqulovtyń GFR-ǵa resmi sapary aiasynda nemis saiasatkerlerimen kelissózderiniń qorytyndysy boiynsha qol jetkizildi.
Qazaqstan SIM basshysy óziniń áriptesi – GFR Syrtqy ister ministri Haiko Maas, Federaldyq prezident vedomstvosynyń basshysy Shtefan Shtainliain, «Germaniia – Ortalyq Aziia» parlamenttik dostyq tobynyń tóraǵasy, Býndestag depýtaty Manfred Grýnd, Ekonomika jáne energetika ministrliginiń Parlamenttik stats-hatshysy Tomas Baraispen kezdesti.
Nemis isteblishmentiniń ókilderi elimizde bolyp jatqan ishki saiasi oqiǵalarǵa joǵary baǵa berdi, táýelsiz Qazaqstannyń memlekettik qurylysyndaǵy Tuńǵysh Prezidenti – Elbasy Nursultan Nazarbaevtyń airyqsha rólin atap ótti. Olar syrtqy saiasi baǵyttyń jalǵasy men jańa Prezident Qasym-Jomart Toqaevtyń júrgizip jatqan áleýmettik-ekonomikalyq reformalaryn quptap, odan ári tabys tiledi.
Kezdesý barysynda B. Atamqulov pen H. Maas ekijaqty qarym-qatynastyń kópjaqty formattaǵy negizgi máselelerin talqylap, «saǵattardy salystyrdy».
Joǵary qyzmettegi nemis diplomaty yntymaqtastyqtyń strategiialyq baǵyttaryn birlesip ázirleýge daiyn ekendigin bildirdi. Ol 180-myńdyq nemis diasporasyn qoldaý jáne Qazaqstanda nemis tilin úirenýdi tanymal etip nasihattaý úshin alǵysyn bildirdi. Taraptar jalpy bilim berý, ásirese dýaldy bilim salasyndaǵy yntymaqtastyqty tereńdetýge kelisti.
Sonymen qatar, joǵary deńgeidegi bailanystardy jalǵastyrý jáne tiisti is-sharalardy uiymdastyrýdyń mańyzdylyǵy atap ótildi.
Ministrler sondai-aq, Germaniia negizgi ról atqarýǵa múddeli Ortalyq Aziia boiynsha EO-nyń jańa strategiiasyn iske asyrýdyń praktikalyq baǵyttaryn qarastyrdy. Bul turǵyda taraptar Aýǵanstandaǵy jaǵdaidy talqylady.
Eki ministr de birlesken baspasóz máslihatynda sóz sóilep, Qazaqstan-German saiasi bailanystar men ekonomikalyq yntymaqtastyqtyń údemeli damýyna qanaǵattanýshylyq bildirdi.
Sh. Shtainliainmen kelissózder barysynda saiasi yntymaqtastyq máseleleri jónindegi syndarly pikir almasý ótti. SIM basshysy álemdik qaýymdastyqqa úsh dialog negizinde jańa geosaiasi shyndyqty qurý ideiasyn usynǵan Qazaqstannyń Tuńǵysh Prezidenti - Elbasy N.Nazarbaevtyń bastamasyn atap ótti. Óz kezeginde Sh. Shtainliain Germaniianyń derjavalar arasynda dialog ornatýǵa múddeli ekenin atap ótti.
Býndestag múshesi M. Grýndpen kezdesý kezinde ekijaqty parlamentaralyq qatynastar máseleleri qozǵaldy. Ministr bizdiń el basshylyǵynyń halyqaralyq bastamalaryn únemi qoldaǵany úshin alǵysyn bildirdi. Osy turǵyda ol 23-24 qyrkúiekte Nur-Sultanda ótetin Eýraziia elderi spikerleriniń tórtinshi keńesiniń jumysyna Býndestag tóraǵasynyń birinshi orynbasary H.-P. Fridrih qatysatanyn qanaǵattanarlyqpen atap ótti. Nemis depýtaty Qazaqstanǵa 1996 jylǵy óziniń alǵashqy sapary týraly aityp, elimizdiń aǵymdaǵy damý deńgeiimen salystyra otyryp, N. Nazarbaevtyń zor rólin atap ótti.
German ekonomikasy ókilderimen kelissózderde taraptar saýda ainalymynyń ósip kele jatqan kórsetkishterin oń baǵalady, ol 2018 jyly 5,1 mlrd AQSh dollaryn qurady (Germaniia statistikasyna sáikes). Bul rette Qazaqstan Germaniianyń Ortalyq Aziiadaǵy basty áriptesi bolyp tabylady – ótken jylǵy saýdanyń jalpy kólemi GFR-dyń óńir elderimen syrtqy saýda operatsiialary kóleminiń 85%-dan astamyn qurady. Aǵymdaǵy jyldyń sońyna deiin energetika, mashina jasaý, JEK, himiia, týrizm, kólik jáne aýyl sharýashylyǵy salasyndaǵy jańa jobalar kiretin eki memleket arasyndaǵy ekonomikalyq jáne ónerkásiptik yntymaqtastyqtyń «Jol kartasyna» qol qoiý múmkindigi talqylandy.
Sońǵy 12 jylda Qazaqstanǵa Germaniiadan 8,6 mlrd AQSh dollar kóleminde tikelei investitsiialar tartyldy. 900-den astam birlesken kásiporyndar qurylyp, bul rette naryqta «Siemens», «WILO», «KNAUF», «BASF», «MetroCash&Carry», «OBI», «CLAAS», «Linde AG» siiaqty iri investorlar jumys isteidi.
Sapar barysynda B. Atamqulovtyń GFR kantsleri keńsesiniń, Germaniianyń syrtqy saýda palatalary qaýymdastyǵynyń basshylyǵymen kezdesýi, sondai-aq nemis biznesi kapitandarymen «dóńgelek ústel» ótkizý josparlanýda.
