QR Indýstriia jáne infraqurylymdyq damý ministri Beibit Atamqulov «Aziia Avto» AQ tóńiregindegi máseleni túsindirdi, dep habarlaidy QazAqparat.
«2010 jyly maýsymda «Aziia Avto» AQ ónerkásiptik avtokólik qurastyrý týraly kelisimge qol qoidy. Bul kelisim boiynsha 7 jylda - 2017 jyldyń 1 maýsymynda olar mindetti túrde investitsiia salyp, tehnologiialyq dánekerleý jáne kólik shanaǵyn boiaý óndirisin ashady degen shart boldy. 2017 jyly bul mindettemeler oryndalmady. Odan bólek, 2012 jylǵy jeltoqsanda «Aziia Avto Qazaqstan» AQ-men 2019 jyldyń 1 jeltoqsanynan bastap dál osy mindettemelerdi oryndaý týraly kelisimge qol qoiyldy. «Aziia Avto» jáne «Aziia Avto Qazaqstan» AQ óz mindettemelerin oryndaýǵa daiyn emestigin eskere otyryp, 2017 jyldyń basynda olar ministrlikke júginip, 2019 jyldyń 1 jeltoqsanyna deiin ónerkásiptik qurastyrý týraly kópjaqty kelisim jasasýdy surady. Osylaisha, ministrlik bul kásiporynǵa birneshe ret qarailasyp keldi», - dedi ministr Úkimette ótken baspasóz máslihatynda.
Ministrdiń aitýynsha, biyl 1 sáýirde «Aziia Avto» jáne «Aziia Avto Qazaqstan» usynǵan esepten keiin olardyń dánekerleý men kólik shanaǵyn boiaý mindettemelerin oryndamaǵany anyqtaldy.
«11 sáýirde ministrlik bul kásiporyndarǵa kemshilikterdi joiý týraly eskertý jiberdi. Bir ai ishinde eskertýdi oryndamasa, bul kelisimsharttardyń buzylýyna jáne basymdyqtardyń toqtatylýyna negiz bola alady. Bul kelisimde ónerkásiptik qurastyrý týraly kelisimniń sharttaryn oryndaýdan basqa jol joq. Sonymen birge, kelisimniń buzylýynan keibir BAQ pen áleýmettik jelilerde habarlanǵandai, kásiporyn jumysy toqtamaidy. Kásiporyndar óz mindettemelerin oryndaǵannan keiin ministrlik kelisim jasaý men basymdyqtar berý múmkindigin qarastyrýǵa daiyn», - dedi B. Atamqulov.
