Elbasymyzdyń «Bolashaqqa baǵdar: rýhani jańǵyrý» atty baǵdarlamasyn oryndaý aiasynda, sondai-aq Qazaqstan men Mysyr elderi arasyndaǵy mádeni qarym-qatynastardy damytý maqsatynda Saǵadat Nurmaǵambetov atyndaǵy Halyqaralyq qoǵamdyq qaiyrymdylyq qorynyń shaqyrtýymen Beibarys Sultannyń tikelei urpaǵy Samiia Beibarys hanym Qazaqstannyń bas qalasy – Astanaǵa qonaqqa keldi.
Kúni keshe Qazaqstan Respýblikasynyń Ulttyq mýzeiine arnaiy bas suǵyp, halyqaralyq kórmelerdi tamashalap, qazaq halqyna ǵana tán kóne jádigerler jáne elimizdiń salt-dástúrin nasihattaityn airyqsha dúnielermen tanysty. Qonaqtar úshin Halyqaralyq «Saqtar altyny» atty túpnusqa jádigerler kórmesine arnaiy ekskýrsiia uiymdastyryldy.
S. Beibarys hanymnyń jumys joly 1993 jyly Arab Memleketteri Ligasyn uiymdastyrýdan bastaldy. 2013 jyly LAS aqparattyq sektorynyń meńgerýshisi bolyp taǵaiyndaldy. Ol arab memleketteriniń Eýropamen qarym-qatynastaryn qadaǵalaidy, sondai-aq arab-afrika yntymaqtastyǵyn, arab-qytai jáne arab-amerika bailanystaryn nasihattaýǵa jaýapty.
Sonymen qatar, Samiia Beibarys hanym «Arab isteri jýrnaly» biznes-basylymynyń keńesshisi, Kair ýniversitetiniń oqytýshysy bolyp qyzmet atqarady. 2017 jylǵy 10 tamyz kúni Qazaqstan Respýblikasy Ulttyq mýzeiinde Arab memleketteri ligasy (LAS) «Mádenietaralyq dialog» departamentiniń basshysy Samiia Beibarys hanymnyń qatysýymen «Mysyrdyń mádenieti men tarihyndaǵy qypshaqtar men mámlúkter» atty dóńgelek ústel ótedi.
Is-sharaǵa Ulttyq mýzeidiń ǵylymi qyzmetkerleri, S.Y. Ysqaqov, Saǵadat Nurmaǵambetov atyndaǵy halyqaralyq qoǵamdyq-qaiyrymdylyq qorynyń Astana qalasy filialynyń prezidenti, kórnekti qoǵam jáne memleket qairatkerleri, Qazaqstan jáne Mysyr elderiniń ǵalymdary, BAQ ókilderi qatysady.
