Túrkistan oblysynda betashar, qudalyq, qyz uzatý syndy otbasylyq merekeler ótkizgen 35 adamǵa aippul salyndy, dep habarlaidy "Ult aqparat".
Oblystyq Politsiia departamentiniń baspasóz qyzmetinen málim etkendei, karantin rejimi aiaqtalmasa da, shekteý sharalaryn elemeitinder qatary azaiar emes. Jaqyndary men týystarynyń basyn qosyp, kópshilikke toi berip, jiyn jasap jatqandar áli de anyqtalýda. Oǵan qosa halyq kóp shoǵyrlanatyn oryndarda betperdesiz júrip, óz ómirin qaterge tigip júrgender de barshylyq.
Máselen, Otyrar aýdany Sháýildir aýylynda birneshe jergilikti turǵynnyń azyq-túlik dúkenine karantin rejimin saqtamai kirgendigi anyqtaldy. Tártip saqshylary atalǵan jaittardy QR Ákimshilik quqyq buzýshylyq týraly kodekske sáikes tirkep, qujattardy zańdy sheshim shyǵarý úshin tiisti organdarǵa jibergen.
2020 jyldyń sońyna qarai 253 tulǵaǵa ákimshilik hattama toltyrylǵan. Onyń ishinde jeke tulǵalar - 209, otbasylyq toi-jiyn jasaǵandar - 35 (betashar-17, qudalyq-10, qyz uzatý-4, kókpar-2, besik toi-1, as-1).
«Karantin kezinde toi-jiyndar, basqosýlar, otbasylyq, merekelik, ujymdyq is-sharalardy uiymdastyrýǵa tyiym salynǵan. Oǵan qosa betperdelik rejim men araqashyqtyqty únemi saqtaý mindetteledi», - dep eskertedi oblystyq PD.
