Premer-Ministr Álihan Smaiylovtyń tóraǵalyǵymen ótken Úkimet otyrysynda «Jasyl Qazaqstan» ulttyq jobasyn iske asyrý barysy qaraldy, dep habarlaidy "Ult aqparat" Úkimet basshysynyń baspasóz qyzmetine silteme jasap.
Ekologiia, geologiia jáne tabiǵi resýrstar ministri Serikqali Brekeshev «Jasyl Qazaqstan» ulttyq jobasynyń negizgi maqsaty atmosferalyq aýanyń lastanýyn azaitý, qaldyqtardy, sý resýrstaryn jáne orman sharýashylyǵyn basqarý júiesin jetildirý ekenin atap ótti.
2021 jyly 16 kásiporyn atmosferalyq aýaǵa shyǵarǵan lastaýshy zat mólsheri 3%-ǵa azaiǵan, al 2022 jyldyń 6 aiynda ótken jyldyń sáikes kezeńimen salystyrǵanda 6,7%-ǵa tómendedi. Bul kórsetkishke tabiǵaty qorǵaý is-sharalarymen qatar, ónerkásipti modernizatsiialaý esebinen qol jetkizilgen.
"Sonymen qatar 3005 poligonnyń 639-y ekologiialyq normalarǵa sáikes keltirildi. Bólek jinaý úshin 3876 konteiner ornatyldy. Nur-Sultan qalasynda qurylys qaldyqtaryn jinaýǵa jáne óńdeýge arnalǵan alań salyndy. Pavlodar oblysynda «Bylqyldaq» kóli aýmaǵynyń lastanýyn oqshaýlaýǵa baǵyttalǵan is-sharalar ótkizilip jatyr.
Sondai-aq kanaldardy, sonyń ishinde Balqash kóliniń basseininde jańǵyrtý jumystary júrgizildi. Syrdariia ózeniniń 50 shaqyrymy tazartyldy. 22 arnanyń sý esebi tsifrlandy. Osy sharalar Balqash kóline shamamen 12 tekshe kilometr sý aǵymyn qamtamasyz etti, Soltústik Aral teńiziniń kólemi 20,6 tekshe kilometr deńgeiinde saqtalyp, sýarý kezinde sý shyǵyny 200 mln tekshe metrge qysqartyldy, kólemi 230 mln tekshe metrge sý qosymsha jinaqtaldy" - delingen aqparatta.
Premer-Ministr qorshaǵan ortany jaqsartý úshin 2023 jylǵy 1 qańtardan bastap iri kásiporyndarda emissiialar monitoringiniń avtomatty júiesin engizý qajettiligi týraly norma kúshine enetinin eske salyp ótti.
«Atalǵan shara árbir kásiporynnyń ziiandy qaldyqtary týraly jedel ári shynaiy aqparat alýǵa baǵyttalǵan. Sondai-aq bul norma kásiporyndarǵa monitoring júrgizip, atmosferaǵa shyǵatyn ziiandy qaldyqtar deńgeii asyp ketken jaǵdaida jedel sharalar qoldanýǵa múmkindik beredi. Ekologiia ministrligine júieni engizýdi erekshe baqylaýǵa alýdy tapsyramyn», — dedi Álihan Smaiylov.
Sonymen qatar Memleket basshysynyń tapsyrmasy boiynsha 5 jyl ishinde 2 mlrd túp aǵash otyrǵyzý týraly aýqymdy joba iske asyrylyp jatyr. 2021 jyly 66 myń gektar alańǵa shamamen 138 mln aǵash otyrǵyzyldy. Alaida, biyl Aqtóbe jáne Batys Qazaqstan oblystarynda qarjylandyrý az bolǵandyqtan, josparly kórsetkish oryndalmai qalýy múmkin.
«Óńirlerdiń ákimdikteri Qarjy ministrligimen birlesip, osy máseleni pysyqtasyn», — dedi Premer-Ministr.
Úkimet basshysy ótken jyldan beri ekologiialyq tólemder ekologiialyq ahýaldy jaqsartý sharalaryna baǵyttalýy tiis degen norma qoldanylyp jatqanyn atap ótti.
«Ol úshin Ekologiia ministrligi ákimdiktermen birge árbir óńir boiynsha ekologiialyq jaǵdaidy jaqsartý úshin is-sharalar josparyn ázirleýi kerek», — dedi Álihan Smaiylov.
Premer-Ministr Indýstriia jáne infraqurylymdyq damý, Qarjy, Ekologiia, geologiia jáne tabiǵi resýrstar ministrlikterine iri eldi mekenderde turmystyq qatty qaldyqtar poligondaryn salý úshin jobalaý-smetalyq qujattamany ázirleýge qarajat bólý máselesin pysyqtaýdy tapsyrdy.
