QR Prezidentiniń baspasóz hatshysy Berik Ýáli Mańǵystaý oblysynyń Bozjyra qoryǵy aýmaǵynda qonaqúi qurylysy jobasyn qaita qaraý týraly Memleket basshysy Qasym-Jomart Toqaevtyń tapsyrmasyna túsinik berdi, dep habarlaidy "Ult aqparat".
«Keshe Facebook áleýmettik jelisinde Prezidenttiń Bozjyra qoryǵy aýmaǵynda salynatyn qonaqúidiń qurylysyn qaita qaraýdy tapsyrǵany jaiynda jazyp edik. Atalǵan jazba aqparat quraldary men áleýmettik jelilerde qyzý talqylanyp, túrli suraqtar qoiylyp jatyr. Sondyqtan osy máselege taǵy bir márte oralyp, qosymsha túsinikteme bergendi jón dep taptyq.
Mańǵystaý oblysynda týrizmdi damytý – Úkimetke júktelgen mańyzdy mindetterdiń biri. Búginde bul baǵytta jumystar bastalyp ketti. Bes juldyzdy qonaqúi salynyp, jaily meimanhanalardyń tutas jelisin qurý josparlanyp otyr. Mundai júieli jumystar aimaqtyń týristik tartymdylyǵyn arttyratyny sózsiz.
Jaqynda Bozjyra tabiǵi qoryǵynyń janynan qonaq úi salý jobasy usynyldy. Ókinishke qarai, qazirgi kezde qoryqtyń ainalasyndaǵy týrizm tabiǵatty qorǵaý sharalaryn saqtamai, beibereket damyp jatyr. Bul osy erekshe tabiǵat qoryǵyna orasan ziianyn tigizýde. Prezident ekologiialyq týrizmdi órkenietti jolmen damytýdy qoldaidy. Ol úshin qajetti infraqurylym, eń aldymen, jaily qonaqúiler qajet. Sondyqtan Memleket basshysy Úkimetke qonaqúi salý jobasyn qaita qaraýdy tapsyrdy. Biraq bul joba osymen toqtaidy degendi bildirmeidi», - dep jazdy Berik Ýáli Facebook-te.
Onyń aitýynsha, qoǵamdyq keńesterdiń, ekolog sarapshylardyń jáne memlekettik vedomstvolardyń oi-pikirleri eskerile otyryp, qonaqúi salýǵa arnalǵan basqa yńǵaily jer tańdalatyn bolady.
Aita keteiik, áleýmettik jelide Bozjyrada qonaqúidiń qurylysy bastalǵany jóninde video tarap, bul jaǵdai halyqtyń ashý-yzasyn týǵyzǵan edi. Keiin Bozjyrada qonaqúi salý jobasyna Ekologiia ministrligi men Mádeniet vitse-ministri pikir bildirgen bolatyn.
