QR Ortalyq sailaý komissiiasynyń tóraǵasy bolyp Berik Imashev taǵaiyndaldy, dep habarlaidy "Ult aqparat".
Ol buǵan deiin QR Ádilet ministri qyzmetin atqarǵan bolatyn. «Berik Májituly Imashev QR Ortalyq sailaý komissiiasynyń tóraǵasy qyzmetine taǵaiyndalsyn», - dep jazylǵan Elbasy Jarlyǵynda.
Berik Imashev 1960 jyly 7 maýsymda týǵan. M.V.Lomonosov atyndaǵy Máskeý memlekettik ýniversitetin bitirgen. Quqyqtanýshy, zań ǵylymdarynyń kandidaty.
Qazaqstan Respýblikasy Prezidentiniń kómekshisi - Qaýipsizdik Keńesiniń Hatshysy bolyp qyzmet atqarǵan.
Qazaqstan Respýblikasy Prezidentiniń 2011 jylǵy 23 qarashadaǵy Jarlyǵymen Qazaqstan Respýblikasy Parlamenti Senatynyń depýtaty - Konstitýtsiialyq zańnama, sot júiesi jáne quqyq qorǵaý organdary komitetiniń tóraǵasy bolyp taǵaiyndaldy.
«Qurmet», «Parasat» ordenderimen, TMD PAA keńesiniń Qurmet gramotasymen, alty medalmen marapattalǵan.
Qazaqstan Respýblikasy Prezidentiniń 2012 jylǵy 20 qańtardaǵy Jarlyǵymen Qazaqstan Respýblikasy Ádilet ministri bolyp taǵaiyndaldy.
