Qazaqstan óziniń táýelsizdiginde mundai qatygezdikke alǵash ret tap boldy. Bul týraly Parlament Májilisiniń jalpy otyrysynda QR Bas prokýrory Berik Asylov málim etti, dep habarlaidy QazAqparat.
«Mitingiler bastapqyda beibit bolǵany ózderińizge belgili. Birinshi qańtardan bastap bastys óńirdegi turǵyndar gaz baǵasyn tómendetýdi talap etti. Iaǵni eshqandai saiasat bolǵan joq, taza áleýmettik-ekonomikalyq talaptar qoiyldy. Óńirge jedel túrde joldaǵan Úkimet komissiiasy gaz baǵasyna qatysty talaptardy qanaǵattandyrdy. Osyǵan qaramastan, Almaty, Shymkent jáne basqa óńirlerde adamdar kóshege shyqty. Solardyń jalpy sany eki kúnde 50 myńnan asty», - dedi Asylov.
Osy oraida Bas prokýror kóshege shyqqan adamdardyń eń kóbi Almatyda tirkelgenin jetkizdi.
«Basynda jiyndar beibit sipatta ótti. Alaida jaǵdaidyń baqylaýdan tys shyǵýy qateri saǵat saiyn arta bastady. Sondyqtan ákimder men depýtattar halyqpen san ret kezdesip, qoǵamdyq tártipti buzbaýdy surady. Al prokýrorlar jer-jerde narazylyq aktsiialarynyń zańsyzdyǵyn jáne olarǵa qatysty qatysý úshin jaýapkershilikti túsindirdi», - dedi Bas prokýror.
Eske sala keteiik, búgin Májilistiń jalpy otyrysynda Bas prokýratýra, Ishki ister, sybailas jemqorlyqqa qarsy qyzmet jáne basqa da memlekettik organ basshylary «qańtar oqiǵasyna» qatysty tergeý barysy týraly depýtattar saýalyna jaýap berýde.
