Qańtar oqiǵasynyń ekstremizmge, kriminalǵa jáne dini radikalizmge ulasqanyn kórip otyrmyz. Bul týraly Parlament Májilisiniń jalpy otyrysynda QR Bas prokýrory Berik Asylov málim etti, dep habarlaidy QazAqparat.
«Osy arqyly qańtar oqiǵasy birneshe tolqynnan turdy dep sipattaýǵa bolady. Birinshi tolqynda beibit miting boldy. Olar politsiiamen eshqandai qaqtyǵysqa barǵan joq. Kerisinshe, bilik beibit miting ótkizýge barlyq múmkindikti jasady. Alaida mitingige shyqqandardyń qataryna túrli ekstremister kirip, olar narazylyqty radikaldy arnaǵa buryp jiberdi. Olardyń arandatýshylyǵynan birinshi qaqtyǵystar bastaldy jáne ol ekinshi tolqyn boldy», - dedi Berik Asylov.
Onyń aitýynsha, úshinshi tolqyn kezinde kópshilikke kriminaldy bandylar qosylǵan. Osynyń saldarynan tonaý men nysandardy órtteý bastaldy. Osy dúrbeleńdi qarýly radikaldar paidalanyp, naqty shabýyldardy uiymdastyrdy.
«Biz osydan oqiǵanyń ekstremizmge, kriminalǵa jáne dini radikalizmge ulasqanyn kórip otyrmyz. Eger memleket tarapynan naqty sheshim bolmasa, bul tolqyndardan keiin basqa da saldar bolýy múmkin edi. Sońǵy kezeńde bilikti kúshpen basyp alýǵa barar edi», - dedi Bas prokýror.
