Adamnyń destrýktivti dini aǵymda júrgenin bildiretin syrtqy atribýttar tiisti zań qabyldanǵannan keiin anyqtalady. Bul týraly búgin qoǵamdyq damý vitse-ministri Berik Aryn málimdedi, dep habarlaidy Sputnik Qazaqstan.
Aita ketsek, osy jyldyń qyrkúieginde senat betti tumshalaityn kiimge tyiym salatyn zań jobasyn májiliske keri qaitarǵan bolatyn.
"Jalpy, bul zań jobasy depýtattar tarapynan qoldaý tapty. Alaida senat jastardyń shetelde dini bilim alýyna qatysty bir-eki usynys engizip, qujat májiliske keri qaitaryldy. Biraq onda bet-álpetti tumshalaityn kiimge qatysty norma saqtalyp otyr", — dedi Aryn Qazaqstandyq qoǵamnyń rýhani qaýipsizdigi: tájiribesi men keleshegi" Qazaqstan dintanýshylarynyń VIII forýmynda.
Onyń aitýynsha, bet-álpetti tanýǵa kedergi keltiretin atribýttar tek din jaǵynan emes, qaýipsizdik jaǵynan da mańyzdy.
"Máselen, adam kóshege betin tumshalap shyqsa, ol kúdik týdyrady ǵoi. Onyń maqsaty qandai dep oilanasyz?", — deidi vitse-ministr.
Aryn destrýktivti dini aǵymdarǵa jatatynyn bildiretin kiim-keshek úlgileri tiisti zań qabyldanǵannan keiin anyqtalatynyn atap ótti.
"Ony qoǵamdyq damý ministrligi qaýipsizdik organdary jáne ishki ister ministrligimen birlesip daiyndaidy", — dedi ol.
Tipti saqaldyń ólshenip-ólshenbeitini de talqyǵa salynbaq.
"Saqal santimetrmen ólshene me, joq pa, ony keiin bolashaqta talqylaimyz. Arnaiy sarapshylardy, elimizde resmi tirkelgen dini birlestik ókilderin tartamyz. Solardyń pikirin eskere otyryp daiyndaimyz", — dedi Aryn.
