Qazaqstan Respýblikasy Mádeniet jáne sport Ministrligi «Qazaqstan Respýblikasynyń Ulttyq Mýzeii» RMKK janynan «Sakraldy Qazaqstan» ǵylymi-zertteý ortalyǵy jańa mekemesi quryldy, dep habarlaidy "Ult aqparat" ministrliktiń baspasóz qyzmetine silteme jasap.
«Sakraldy Qazaqstan» ǵylymi-zertteý ortalyǵy qyzmetiniń negizgi maqsaty - ólketaný boiynsha ǵylymi-zertteý jumysy, ólketaný salasyndaǵy aǵartýshylyq jumys, respýblikadaǵy ólketaný jumystaryn ádistemelik qamtamasyz etý, memlekettik jáne qoǵamdyq ólketaný uiymdarymen, jergilikti memlekettik organdar, bilim berý mekemeleri, Qazaqstannyń arhivteri men mýzeilerimen birge yntymaqtastyqta ólketaný taqyrybyndaǵy ǵylymi-zertteý is-sharalaryn uiymdastyrý.
Qazirgi tańda Qazaqstanda QR Tuńǵysh Prezidenti - Elbasy Nursultan Nazarbaevtyń «Bolashaqqa baǵdar: rýhani jańǵyrý» atty maqalasynda usynǵan «Qazaqstanyń qasietti rýhani qundylyqtary» («Qazaqstannyń kieli jerleriniń geografiiasy»), «Týǵan jer» jobalaryn qurý máseleleri talqylaný ústinde. Baǵdarlama aiasynda aýqymdy ólketaný jumystaryn júrgizýdi, ekologiiany jaqsartýǵa jáne eldi mekenderdi abattandyrýǵa basa mán berýdi, jergilikti deńgeidegi tarihi eskertkishter men mádeni nysandardy qalpyna keltirýdi qolǵa alý kózdelgen. Sondai-aq, Elbasy «Týǵan jer» jobasymen birge jalpyulttyq qasietti oryndar uǵymyn sińirý qajettiligin atap óttti. Osylaisha, Prezident «Qazaqstanyń qasietti rýhani qundylyqtary» nemese «Qazaqstannyń kieli jerleriniń geografiiasy» jobasyn usyndy. «Patriotizm kindik qanyń tamǵan jerińe, ósken aýylyńa, qalań men óńirińe, iaǵni týǵan jerińe degen súiispenshilikten bastalady. Sol sebepti, men «Týǵan jer» baǵdarlamasyn qolǵa alýdy usynamyn» - dep atap ótken bolatyn Elbasy Nursultan Nazarbaev.
«Sakraldy Qazaqstan» ǵylymi-zertteý ortalyǵynyń basshysy bolyp Berik Baqytuly Ábdiǵaliev taǵaiyndaldy.
Berik Baqytuly Ábdiǵaliev Ál-Farabi atyndaǵy Qazaq ulttyq ýniversitetin támamdaǵan. Qazaqstan strategiialyq zertteýler institýtynda ǵylymi qyzmetker, Ishki saiasat bóliminiń meńgerýshisi, direktordyń orynbasary bolyp qyzmet atqarǵan. Temirtaý qalasy ákiminiń orynbasary, Jezqazǵan qalasynyń ákimi, 2012-2013 jyldary Qostanai oblysy Arqalyq qalasynyń ákimi qyzmetterin atqardy.
