Búgin QR Joǵarǵy soty Atyraý oblysynyń eks-ákimi Bergei Rysqalievtiń isine qatysty Bas prokýratýranyń kassatsiialyq qarsylyǵyn qanaǵattandyrdy. Nátijesinde barlyq tárkilengen múlik burynǵy ákimniń otbasyna qaitarylatyn boldy, - dep habarlaidy «Ult aqparat».
Bul aqparatty Joǵarǵy sottyń baspasóz jetekshisi Aidos Sádýaqasov ta rastady. «Iá, shynymen de búgin Joǵarǵy sot Bas prokýratýranyń kasatsiialyq qarsylyǵyn qarastyryp, qanaǵattandyrdy», – dedi ol.
Mamyr aiynyń sońynda Bas prokýror Ǵizat Nurdáýletov Bergei Rysqaliev pen onyń aǵasynyń múligin tárkileý bólimine qatysty úkimin qaita qarastyrý úshin Joǵarǵy sotqa kassatsiialyq qarsylyq túsirgen bolatyn.
Aita ketý kerek, 2008 jyldan beri Rysqaliev, Alqabasov jáne Izbasar biýdjet qarjysyna iri kólemde shyǵyn keltirgeni úshin aiyptalyp, isti bolǵan edi. Alaida, sot bas prokýrordyń túsiniktemesine súienip, 2008 jylǵa deiin atynda bolǵan múligin tárkilegen.
Bergei Rysqaliev 2006-2012 jyldar arasynda Atyraý oblysynyń ákimi boldy. Al onyń aǵasy Amanjan májiliste depýtat edi. 2013 jyly Qarjy politsiiasy olarǵa qarsy qylmystyq is qozǵap, ártúrli qylmystyq aiyp taǵyp, syrttaý úkim shyǵardy.
