«Berekeli baspana» baǵdarlamasy aiasynda elordalyq kópbalaly otbasylar 6-7 myń teńgege páter jaldap tura alady, dep habarlaidy QazAqparat tilshisi.
Bul týraly Nur-Sultan qalasy ákiminiń orynbasary Erlan Qanalimov málimdedi.
Búgin «Kópbalaly otbasy» sanatynda turǵyn úi kezeginde turǵan 150 otbasyǵa arendalyq páterdiń sertifikatyn berý bastaldy.
«Arendalyq páterler №63 litsei mańynda, Sh. Qudaiberdiuly men R. Qoshqarbaev kósheleriniń qiylysynda salynǵan. Kópbalaly otbasylardyń baǵdarlamasy bolǵandyqtan, bir bólmeli emes, 2-3 bólmeli páterler beriledi. 2 bólmeli páterdiń aýdany - 50-55 sharshy metr, 3 bólmeli páterlerde - 85-90 sharshy metr. Jaldaý quny - páterdiń árbir sharshy metrine 70 teńgeden. Iaǵni, orta eseppen aiyna 6-7 myń teńgege jaldap turýǵa bolady», - dedi Erlan Qanalimov qala ákimdiginde ótken baspasóz máslihatynda.
Onyń aitýynsha, jaldamaly páter alýda analardyń tabys mólsheri tekserilmeidi.
«Sonymen birge, Táýelsizdik kúni qarsańynda 600-den astam jańa arendalyq páter eń kemi bes jylǵa qoldanysqa beriledi. Oǵan qosa, 2019 jyldyń shilde aiynda kópbalaly otbasylarǵa jeńildetilgen 2% nesiemen baspana berý baǵdarlamasy iske qosylady. Kezekte turǵan kópbalaly otbasylardyń baspana máselesi osylai sheshiledi», - dep atap ótti Erlan Qanalimov.
Arendalyq baspana boiynsha biyl kópbalaly otbasylarǵa 928 páter qarastyrylǵan. Birinshi kezeńde sonyń 150-i kezek basynda turǵan kópbalaly otbasylarǵa beriledi. Odan bólek, qosymsha 400 arendaldyq baspana ózge de az qamtylǵan otbasylarǵa bólingen.
