Resei premer-ministri Dmitrii Medvedev tamyz aiynda Túrkimenstanǵa barmaq. Buǵan deiin Túrkimenstan basshysy Gýrbangýly Berdimuhamedovtiń ólimi jaily sybystar taraǵan edi.
Resei premer-ministri baspasóz qyzmetiniń málimetine sáikes, Medvedev Túrkimenstanǵa 11-12 tamyzda baryp, Kaspii ekonomikalyq forýmyna qatyspaq. Sapar aiasynda prezident Gýrbangýly Berdimuhamedovpen kezdesip, eki jaqty qarym-qatynas máselelerin talqylamaq.
Berdimuhamedovtiń shilde aiynyń basynan beri kórinbei ketýi, tipti Eýropa odaǵynyń syrtqy ister jáne qaýipsizdik saiasat boiynsha joǵarǵy ókili Federika Mogerinidiń Ashǵabatqa sapary kezinde de qoǵam aldyna shyqpaýy onyń densaýlyǵyna bailanysty túrli qaýesetti órshitti. Al Túrkimenstan biligi prezidenttiń 15 tamyzǵa deiin demalysta ekenin birneshe ret málimdegen. Kaspii forýmy prezidenttiń demalys merzimi resmi túrde aiaqtalǵanǵa deiin bastalyp qoiady.
15 shildede Túrkimenstannyń memlekettik aqparat quraldary teledidar aldynda otyrǵan 62 jastaǵy Gýrbangýly Berdimuhamedovtiń jańa kitabyn jazyp jatqan sátin kórsetken. Biraq videonyń qai kúni túsirilgeni belgisiz.
Quqyq qorǵaýshylar Túrkimenstandy álemdegi eń jabyq ári qýdalaýǵa beiim elder qataryna jatqyzady. Eldiń barlyq-derlik salasyna Berdimuhamedov pen ainalasyndaǵy saiasatkerler aralasyp, qatań baqylaýda ustaidy.
