QR Premer-Ministriniń orynbasary Berdibek Saparbaev Jambyl oblysyna jumys sapary barysynda qoǵam ókilderimen, pedagogtar jáne densaýlyq salasynyń mamandarymen kezdesti, dep habarlaidy QazAqparat tilshisi.
Aldymen, vitse-premer bastaǵan úkimettiń jumysshy toby oblystyq qazaq drama teatrynda jambyldyq túrli salanyń mamandary men qoǵam belsendileri men úkimettik emes uiymdardyń ókilderimen kezdesti. Onda B. Saparbaev memlekettiń áleýmettik-ekonomikalyq saiasatyndaǵy airyqsha mán berilip otyrǵan basymdyqtarǵa toqtaldy. Óz sózinde búginde Taraz qalasynyń shyn mánisinde kún sanap tarihi kelbeti aishyqtalyp, jańǵyryp kele jatqanyn aityp ótken Premer Ministrdiń orynbasary el Úkimeti aldyndaǵy aýqymdy mindetterdi tilge tiek etti.
Turǵyndardyń turmys sapasyn jaqsartýdyń bir joly - meditsinalyq qyzmettiń qoljetimdi bolýy ekeni belgili. Halyq densaýlyǵyn saqtaýda alǵashqy dárigerlik kómekti tiimdi uiymdastyrýdyń mańyzy zor. Bul rette Jambyl óńiri jumysty júieli júrgizip, respýblika boiynsha alǵa shyǵyp otyr. Osyny basa aitqan Berdibek Saparbaev densaýlyq saqtaý ministri Eljan Birtanovqa eldi mekenderdi ambýlatoriialar jáne medpýnkttermen qamtýda ózgeshe úlgi kórsetip, memlekettik-jekeshelik áriptestik tetigin tiimdi paidalanyp otyrǵan Jambyl oblysynyń tájiribesin ózge óńirlerge taratýdy tapsyrdy.
Kezdesýde vitse-premer keler jyldan bastap engizýge usynylyp otyrǵan ataýly áleýmettik kómektiń jańa júiesi týraly da aityp ótti.
«Shyn muqtaj azamattardy áleýmettik turǵyda qorǵaý úshin ári masyldyq piǵyldy órshitip almaý maqsatynda Úkimet ataýly áleýmettik kómekti tóleýdiń mehanizmin ózgertýdi usynyp otyr. Biz bir nárseni túsinýimiz kerek. Bul - aty aityp turǵandai, ataýly kómek. Jyl boiy tólenetin jalaqy emes. Ol qoldaýǵa zárý otbasylarǵa áleýmettik jaǵdaiyn túzep alý úshin belgili bir merzimge taǵaiyndalady. Ekonomikany turaqtandyrýdyń joly - eńbek», - dedi Berdibek Máshbekuly.
Úkimet basshysynyń orynbasary sondai-aq múmkindigi shekteýli jandardy ońaltý maqsatynda beriletin arnaiy qurylǵylarmen qamtý júiesin jaqsartý úshin arnaiy portal ashylǵanyn da tilge tiek etti. Tiisti qural-jabdyqtarǵa tapsyrys berýge tender eń tiimdi jol emes ekenin, sonyń saldarynan buǵan deiin qoldaýdy qajet etetin azamattardy kerek qurylǵymen qamtýda kedergi týyndaǵanyn sóz etti. Arnaiy portal endi osy túitkilderden qutylýǵa múmkindik bermek. Jiynda jumyspen qamtý, biryńǵai áleýmettik qor jáne biryńǵai áleýmettik tólem týraly da aityldy.
Vitse-premerdiń Jambyl jurtshylyǵymen júzdesýi erkin formatta ótkenin aita ketken jón. Turǵyndar Berdibek Saparbaevqa kókeide júrgen suraqtaryn qoiyp, ózekti máselelerdi alǵa tartty.
Sondai-aq, QR Premer-Ministriniń orynbasary Berdibek Saparbaev óńirdiń pedagog qaýymymen júzdesip, salaǵa qatysty birqatar máselelerdi saralady. Taraz qalasyndaǵy №30 mektep-gimnaziiasynda ótken kezdesýge oblys ákimi Asqar Myrzahmetov, Bilim jáne ǵylym ministriniń orynbasary Sholpan Karinova qatysty. Basqosýda alǵash bolyp sóz alǵan Bilim jáne ǵylym ministriniń orynbasary Sholpan Karinova saladaǵy ózekti máselelerdi ortaǵa salyp, olardy sheshý baǵytynda atqarylyp jatqan jumystardy tilge tiek etti.
«Qazir respýblikadaǵy barlyq mektepteri 10-synypqa deiin jańartylǵan bilim berý júiesin kóshti. Pedagogter bul júie boiynsha biliktiligin arttyrý kýrstarynan da ótti. Ózderińizge málim, bilim salasyndaǵy eń ózekti másele «Pedagogter mártebesi týraly» Zańnyń qabyldanýy bolyp otyr.Qazir bul zań jobasy Qazaqstan Respýblikasynyń Parlamentiniń qaraýynda jatyr.
Sondai-aq biyl pedagogterdiń biliktilik sanatyn anyqtaý testi ustazdar qaýymynyń usynysyna sai elektrondy formatta óte bastady», –dedi Sholpan Qanatqyzy.
Vitse-ministr óz sózinde mektepke deiingi bilim berý mekemelerin baǵalaýdyń jańa júiesi, dýaldy bilim berýdi jetildirýdiń jai-japsary týraly da aityp ótti.
Óz kezeginde Berdibek Saparbaev ustazdarǵa otandyq bilim berýdegi ózekti máselelerdi sheshýge Úkimet tarapynan tiisti jumystardyń qolǵa alynǵanyn jetkizip, bul iste birlese áreket etýge shaqyrdy. Al kezdesýdi qorytyndylaǵan oblysy ákimi Asqar Myrzahmetov oqýshylardyń rýhani tanym-túsinigin damytýdy arnaiy pándi oqytý arqyly jolǵa qoiý usynysyn jetkizdi.
Vitse-premerdiń oblysqa jumys sapary oblystyq balalar aýrýhanasynda túiindeldi. Onda B. Saparbaev jambyldyq dárigerler men meditsina qyzmetkerlerimen kezdesti. Basqosý barysynda elimizdiń densaýlyq saqtaý ministri Eljan Birtanov baiandama jasap, mindetti meditsinalyq saqtandyrý bastamasyna qatysty atqarylǵan jumystardy tilge tiek etti. Sondai-aq ministr mindetti meditsinalyq saqtandyrý baǵdarlamasyn buqaraǵa túsindirýde Jambyl oblysy aldyńǵy qatarda kele jatqanyn jetkizip, óńirdegi jumysqa oń baǵasyn berdi. Baiandama tyńdalǵannan keiin jiynǵa qatysýshylar ministrge mindetti meditsinalyq saqtandyrýǵa qatysty birqatar saýaldaryn qoidy. Ol barlyq saýaldarǵa tushymdy jaýap berip, aimaq dárigerlerin bul baǵytta jumyla jumys jasaýǵa shaqyrdy.
Kezdesýdi qorytyndylaǵan Berdibek Máshbekuly Jambyl oblysynda atqarylyp jatqan jumystarǵa kóńili tolatyndyǵyn aityp, alaida áleýmettik jelilerde dárigerler tarapyna baǵyttalǵan syndarǵa aimaqtyń aq halatty abzal jandary der kezinde jaýap bermeitindigine qynjylys bildirdi. Sol sebepti Premer-Ministrdiń orynbasary dárigerlerge syn men min taǵylyp jatsa, bul tutas el meditsinasyna aitylǵan dúnie dep qabyldap, judyryqsha jumylý qajettigin tapsyrdy.
