Kópbalaly otbasylarǵa úi salyp alýy úshin jer ýchaskesin bólý máselesin qarastyrý qajet. Bul týraly búgin Úkimet otyrysynda QR Eńbek jáne halyqty áleýmettik qorǵaý ministri Berdibek Saparbaev aitty, dep habarlaidy QazAqparat tilshisi.
Onyń aitýynsha, múgedektigi bar balalarǵa jáne 18 jastan asqan, týabitti birinshi toptaǵy múgedekterge kútim jasap otyrǵan 100 myń azamattyń járdemaqysy 31 183 myń teńgeden 41 578 myń teńgege ósedi.
«Tolyq emes kópbalaly otbasylardyń úide jumys isteýine jaǵdai jasaý úshin aýyldaǵy kópbalaly otbasylarǵa granttar men mikrokredit beriledi. Jalpy granttar qaralǵan. Aýyldaǵy kópbalaly otbasylardy jumyspen qamtý, otbasy biznesin ashý, tabystaryn arttyrý úshin qaitarylmaityn 500 myń teńgeden 20 million teńgege deiin jańa biznes ashý úshin memlekettik granttar beriledi», - dedi ol.
Ministrdiń dereginshe, 2019 jylǵa josparlanǵan mikrokreditteý aiasynda 14 myń mikrokredittiń 5 myńy aýyldyq jerlerdegi kópbalaly analar men múgedektigi bar adamdar arasynda kásipkerlikti damytýǵa jumsalady. Nátijesinde kópbalaly 15 myń otbasy jeke isimen ainalysýǵa jáne tabysyn arttyrýǵa múmkindik alady.
Kópbalaly analar men múgedek balany tárbielep otyrǵan analardy jumyspen qamtý jáne ózin-ózi damytýǵa qoljetimdilikti keńeitý úshin suranysqa ie kásipterge qysqa merzimdi oqytýlar uiymdastyrylady.
«Bunyń barlyǵy - Úkimet tarapynan jasalatyn kómekter. Bul rette sizden suraitynymyz - óńirlerdiń ákimderine qosymsha tapsyrma berseńiz. Bizde kóptegen kásiporyndar, kásipkerler nashar turatyn, kópbalaly otbasylarǵa kómektesedi. Olar ózderinde jumys isteitin kópbalaly otbasylarǵa páter jaǵynan kómektesse. Ekinshisi - jer berý máselesi. Kezdesken kezde estigenbiz. Kópbalaly analar «bizge berseńizder, páterge tólep otyrǵan aqshamyzdy soǵan jumsap, úi salatyn edik» deidi. Sonymen qatar, bastapqy jarnanyń jartysyn jergilikti biýdjetten alý týraly da usynys bar», - dedi B.Saparbaev.
