QR Eńbek jáne halyqty áleýmettik qorǵaý ministri Berdibek Saparbaev Nur-Sultan qalasynda kópbalaly analarmen kezdesti, dep habarlaidy "Ult aqparat".
Vedomstvonyń baspasóz qyzmetinen málim etkendei, kezdesýge sondai-aq, Eńbek jáne halyqty áleýmettik qorǵaý vitse-ministri Svetlana Jaqypova, Densaýlyq saqtaý vitse-ministri Lázzat Aqtaeva, Bilim jáne ǵylym vitse-ministri Elmira Sýhanberdieva, QR Indýstriia jáne infraqurylymdyq damý ministrligi Qurylys jáne turǵyn úi kommýnaldyq sharýashylyǵy isteri komitetiniń tóraǵasy Marhabat Jaiymbetov, Nur-Sultan qalasynyń Jumyspen qamtý jáne áleýmettik qorǵaý basqarmasynyń basshysy Sáýle Nurǵojina qatysty.
Onyń barysynda kópbalaly analarǵa memlekettik qoldaý sharalary týraly aqparat berildi. Qoldanystaǵy jeńildikterden basqa, kelesidei qosymsha sharalar da qarastyrylýda - zeinetkerlikke 53 jasta merziminen buryn shyǵý, jumys istemeitin ananyń 3 jasqa deiingi bala kútimi boiynsha kezeńin eńbek ótiline qosý, salyq pen baj salyǵynyń keibir túrlerin tóleýden bosatý quqyǵy, turǵyn úige jeńildetilgen kezekke turǵyzý jáne mundai sanattaǵy azamattarǵa memlekettik qoldaýdy kúsheitý.
Nátijeli jumyspen qamtýdy jáne jappai kásipkerlikti damytýdyń «Eńbek» memlekettik baǵdarlamasyna ózgerister engizilýde. Máselen, jumyspen qamtýdy qamtamasyz etý jáne tabysty arttyrý úshin aýylda turatyn kópbalaly otbasylarǵa jańa biznes-ideialarǵa 505 myń teńge mólsherinde qaitarymsyz memlekettik granttar beriletin bolady. Sondai-aq, aǵymdaǵy jyly kópbalaly analar men múgedektigi bar adamdar arasynda kásipkerlikti damytýǵa 5 myń mikrokredit beriledi.
«Sonymen qatar, aýylda turatyn az qamtylǵan otbasylar úshin qajetti mamandyqtarǵa qysqa merzimdi oqytý uiymdastyrylady. Jekelegen jumys túrleri boiynsha jalaqyny sýbsidiialaýmen úide áleýmettik jumys oryndary qurylatyn bolady. Budan bólek, ministrlik áleýmettik jaǵdaiy tómen otbasylarǵa jergilikti atqarýshy organdar tarapynan kórsetiletin áleýmettik kómek pen qyzmetterdiń biryńǵai paketin ázirledi. Áleýmettik pakette jergilikti atqarýshy organnyń qarajaty esebinen áleýmettik qoldaý jáne áleýmettik qyzmet kórsetý boiynsha 11 shara qamtylǵan. Ákimdikterdiń málimetinshe, 2019 jyly 287 myń bala mektepterde tegin tamaqpen, 553 myń adam tegin jol júrýmen, 219 myń oqýshy mektep formasymen jáne kerek-jaraqtarmen, 30 myńǵa jýyq bala balabaqshalarda orynmen qamtamasyz etiledi, 186 myń bala lagerge joldama alady, 460 myńnan astam adam bir jolǵy kómek alady, 5 myń AÁK alýshy jumyspen qamtylady, 5 myń adam turǵyn úi qurylys jinaqtary júiesi arqyly baspana jaǵdaiyn jaqsartady. Jalpy áleýmettik kómektiń barlyq túrlerimen 83,1 mlrd. teńgege 821 myń adamdy qamtý josparlanýda», - delingen baspasóz baianynda.
Kezdesýge qatysqan kópbalaly analar «Baqytty otbasy» baǵdarlamasy aiasynda turǵyn úi jaǵdaiyn jaqsartý, jalpy bilim berý qory aiasyndaǵy qoldaý, sanatorlyq-kýrorttyq emdeý, meditsinalyq qyzmet kórsetý, sonyń ishinde stomatologiialyq qyzmet kórsetý jáne basqa da memlekettik qoldaý sharalaryn alý týraly suraqtar qoiǵan.
Ministrlik jáne ákimdik ókilderi barlyq suraqtar boiynsha túsinikteme bergen.
«Eńbek ministrligi vedomstvo quzyretine kiretin máselelerdi sheshýdi jeke baqylaýǵa aldy. Aǵymdaǵy jylǵy 1 mamyrdaǵy jaǵdai boiynsha Qazaqstanda «Altyn alqa» jáne «Kúmis alqamen», «Ana dańqy» ordenderimen marapattalǵan, buryn «Batyr ana» ataǵyn alǵan 235 myńnan astam kópbalaly ana turady. Onyń 4787-si Nur-Sultanda turady.
