Búgin QR Premer-Ministriniń orynbasary Berdibek Saparbaev pen Atyraý oblysynyń ákimi Nurlan Noǵaev aimaq jurtshylyǵymen kezdesti, dep habarlaidy "Ult aqparat".
Úkimet basshysynyń orynbasary óz sózinde el Prezidentiniń Qazaqstan halqyna arnaǵan Joldaýyndaǵy qoiylǵan mindetterdi sheshýge baǵyttalǵan sharalar týraly baiandady. Negizgi maqsattardyń biri - otandastarymyzdyń ómir súrý deńgeiin kóterý. Jyl saiyn áleýmettik salany qarjylandyrý ósip keledi. Aǵymdaǵy jyly memleket biýdjetiniń 45% densaýlyq saqtaý, bilim berý, mádeniet pen sportty qarjylandyrýǵa jumsaldy. Taǵy bir mańyzdy maqsat - jalaqy deńgeiin kóterý. Bul másele ókimettiń jyl saiynǵy kún tártibinen túspei keledi. «Az qamtylǵan, kóp balaly otbasylardy qoldaý kún tártibinen túspeidi. Osy sanattaǵy otandastarymyzdy qoldaý úshin búginde biýdjetten 147 mlrd teńge jumsaldy. Bul baǵytta 2 mln adam qamtyldy», - dedi Berdibek Saparbaev.
Osyndai otbasylarǵa óz isin ashyp, áleýmettik jaǵdaiyn jaqsartyp alý úshin memleket barlyq jaǵdailardy jasaýda. Esepteýler boiynsha, 8 myń adam óz isin bastap, 7 myń adam ataýly áleýmettik kómekti jeke sharýashylyǵyn damytýǵa jumsaǵan. 3,5 myńǵa jýyq kópbalaly otbasy granttar aldy. Bul da áleýmettik jaǵdaidy durystap, qoǵamdaǵy ahýaldy qalyptastyrýǵa septigin tigizedi.
B. Saparbaev ataýly áleýmettik kómek berý týraly aita kelip, qoldaý kórsetý masyldyq piǵyldyń órshýine soqtyrmaý kerektigin de atap ótti. Sonymen qatar, daryndy balalardy qoldaý kartasy men 2030 jylǵa deiin jasaqtalǵan balalardyń múddesine arnalǵan Qazaqstan Respýblikasynyń saiasaty týraly tujyrymdamasy jóninde de bólek áńgime qaýzady. Áleýmettik jaǵynan az qamtylǵan toptarǵa qarjylyq salmaqty azaitýǵa baǵyttalǵan biraz sharýa atqaryldy. 500 myń otandasymyzdyń tutyný nesieleri azaityldy.
Azamattyq qoǵamdy damytý da ózekti taqyryptardyń biri. Úkimet basshysy orynbasarynyń sózine qaraǵanda, eki tujyrymdama jasaqtalýda: biri - «Eleńdeitin memleket» jáne 2025 jylǵa deiingi azamattyq qoǵamdy damytý. Bul qujattar jyldyń sońyna deiin daiyn bolýy kerek. «Memlekettik qyzmetkerler óz jurtshylyǵyna eleńdeýi kerek. Azamattardyń birde-bir ótinishi men shaǵymy qaraýsyz nemese jaýapsyz qalmaýy tiis», - dep atap ótti Berdibek Saparbaev.
Sondai-aq ol bilim berý salasyndaǵy, pedagogtardyń quqyǵyn qorǵaýǵa jónindegi atqarylǵan jumystarǵa da toqtalyp ótti. Materialdyq jaǵdailarynyń jaqsarýyna, jalaqynyń ósýine de qatysty birqatar jumystar jalǵasyn taýyp keledi. «Bizde daryndy balalar óte kóp. Bul - eldiń bolashaǵy. Olardy qoldaýymyz kerek»,- dedi óz sózinde Premer-Ministrdiń orynbasary.
