Premer-Ministrdiń orynbasary Berdibek Saparbaev halyqtyń ál-aýqatyn arttyrý baǵytyndaǵy sharalar qalai júrgizilip jatqanyn aityp berdi, dep habarlaidy QazAqparat.
Elbasy Nursultan Nazarbaevtyń «Nur Otan» partiiasynyń Saiasi keńesi Biýrosynyń otyrysynda júktegen tapsyrmalary týraly sóz qozǵaǵan Berdibek Saparbaev qandai baǵyttaǵy áleýmettik sharalarǵa nazar aýdarylyp otyrǵanyn atap ótti.
«Elbasynyń, Memleket basshysynyń tapsyrmalaryn, baǵyt-baǵdarlaryn oryndaý maqsatynda Úkimet qazirgi tańda tiisti is-sharalardy qabyldady. Úkimettiń eń negizgi mindeti – qazaqstandyqtardyń turmysyn jaqsartý, ál-aýqatyn arttyrý. Ózderińiz biletindei, qazaqstandyqtardyń jalaqysy osy jyly eki ese ósti. Jalpy, 3 mln qazaqstandyqtyń jalaqysy 15-ten 30 paiyzǵa deiin kóbeitildi. Eń úlken berilgen tapsyrma – qazaqstandyqtardy jumyspen qamtý, jańa jumys oryndaryn ashý. Qazirgi bizdiń memleketimizde júzege asyrylyp jatqan 14 memlekettik baǵdarlama arqyly biz osy tapsyrmalardy oryndaý baǵytynda jumys júrgizip jatyrmyz», - dedi vitse-premer Úkimettiń baspasóz ortalyǵynda.
Berdibek Saparbaevtyń aitýynsha, biylǵy tapsyrma boiynsha elimizde kem degende 373 myń jańa jumys orny ashylý kerek.
«Kórip otyrǵandaryńyzdai, 7 aidyń qorytyndysy boiynsha ol tapsyrma 60 paiyzǵa oryndaldy. Onyń ishinde 150 myńnan astamy – naqty jumystar. Oǵan qosymsha qazirgi tańda suranys joq mamandyq ielerine suranysqa ie bolǵan mamandyqty oqytý úshin qysqa merzimdegi kýrstar uiymdastyrylǵan. Sizder bilesizder, memleketimizde «Eńbek» baǵdarlamasy sheńberinde «Bastaý», «Jas maman», «Jas kásipker» jobalary júzege asyrylyp jatyr. Mikronesielik granttar, oǵan qosymsha Elbasynyń áleýmettik qamqorlyq sharalaryna sáikes, qosymsha taǵy 15 myń grant berildi. Sonyń nátijesinde jastar ózderiniń kásipterin ashyp, turmystaryn jaqsartty», - dedi Berdibek Saparbaev.
Premer-Ministrdiń orynbasary osy sharalardy júzege asyrý úshin sońǵy naqtylanǵan biýdjet boiynsha 32 mlrd teńge bólingenin atap ótti.
«Qazirge deiin 341 myńnan astam otbasy nemese 1 mln 800 myń qazaqstandyq ataýly áleýmettik kómekpen qamtyldy. Respýblikalyq biýdjetten bul baǵytta 103 mlrd teńge bólindi. Ataýly áleýmettik kómekti alyp otyrǵandardyń 58 paiyzy – aýyl halqy. Aýyl adamdary qosymsha 83 myń adam ózderine kerekti malyn, tehnikasyn satyp alýǵa múmkindik aldy. Jalpy, AÁK arqasynda otbasylardyń tabysy eki ese ósti», - dedi ol.
