Qazaqstanda benzinniń qymbattaýy basqa qyzmetterdiń baǵasyna qalai áser etedi? Tilshilerdiń bul suraǵyna Úkimettiń baspasóz ortalyǵynda Energetika vitse-ministri Áset Maǵaýov jaýap berdi, dep habarlaidy "Ult aqparat".
«Aktsizdi kóterý jónindegi buiryq áli kúshine engen joq. Qazir Ekonomika ministrligi buiryqtyń jobasyn daiyndap, maquldaý úshin barlyq ministrlikke jiberdi. Maquldansa, buiryq 1 qańtardan bastap kúshine enedi. Ulttyq ekonomika ministrliginiń boljamy boiynsha, bul ózgeris benzin baǵasynyń ósýine asa qatty áser etpeýi kerek. Baǵanyń mýltiplikativtik áseri qalai bolatynyn surap jatyrsyzdar. Benzin kommýnaldyq tólem nemese elektr jaryǵy úshin paidalanylmaidy. Suranys kóbinese dizel otynyna artady. Sondyqtan, elektr qýaty men kommýnaldyq tólemderdiń ósýine kóp áser etpeitin shyǵar dep boljaimyz. Naqty jaýapty Ulttyq ekonomika ministrliginen alǵan durys dep oilaimyn», - dedi vitse-ministr.
Áset Maǵaýovqa «Benzin baǵasyn Energetika ministrligi rettei me, álde Ulttyq ekonomika ministrligi me?» degen suraq qoiyldy. Onyń jaýabyna sáikes, benzin baǵasy keiingi úsh jylda rettelmeidi.
«Iaǵni, buryn munai ónimderiniń shekti baǵasy rettelip otyratyn. Benzin baǵasy Úkimettiń tiisti qaýlysymen bekitiletin. Biraq, bul júieden ketip, EAEO nemese basqa keńistikte naryqtyq qarym-qatynasqa kóshýdi kózdedik. Keiingi eki-úsh jylda benzin jáne dizel otynynyń baǵasy rettelmeidi. Osydan 2-3 jyl buryn tapshylyq bolǵan kezde benzin baǵasy kóterilip ketken bolatyn. Ótken jyly, osy jyldyń basynda benzin artylyp, baǵa tómendedi. Demek, jalpy Qazaqstan naryqtyq qarym-qatynasty ustanýy tiis dep oilaimyz. Sol sebepti, qai ministrlik benzin baǵasyn retteýge mindetti dep suraý salýdyń ózi durys emes. Bastysy, naryqta óndirýshiden bastap, sońǵy satýshyǵa deiingi qarym-qatynas, ózara jumys ashyq bolýy kerek», - dedi ol.
