Bender-Abbas portynda Qazaqstannyń terminalyn salýǵa úmittenemiz. Bul týraly búgin Túrkiianyń biznes kapitandarymen kezdesý barysynda Elbasy Nursultan Nazarbaev aitty, dep habarlaidy QazAqparat tilshisi.
«Eýropa men Aziia arasyndaǵy transqurlyqtyq mýltimodaldy tasymal belsendi damýda. Elimiz arqyly 5 temir joly jáne 6 halyqaralyq avtomobil joly ótedi. Transkaspii mýltimodaldy tasymaldy damytý maqsatynda biz keiingi kezderi óte kóp jumys jasadyq. «Nurly jol» baǵdarlamasy men Qytaidyń «Jibek joly» baǵdarlamasy birigip, úlken jumystar atqaryldy», dep atap ótti Nursultan Nazarbaev.
Memleket basshysy Qazaqstannyń ulan-ǵaiyr jerinde 4 jyldyń ishinde 5 myń shaqyrym avtomobil joly, 2,5 myń shaqyrym temirjol salynǵanyn atap ótti. Sonymen qatar Qytaidyń Shyǵys jaǵynda, Tynyq muhity shetindegi Lianiangan portynda Qazaqstannyń terminaly salynǵanyn aitty.
«Sol port arqyly Qytai, Qazaqstan, Resei arqyly Eýropaǵa ótip jatqan konteinerlerdiń sany jyl saiyn eki esege ósip otyrady. Endi qazir biz Aqtaý portyn jańarttyq, onyń múmkindigi keńeidi. Qazaqstan-Ázerbaijan-Grýziia-Túrkiia-Kars-Kartsahi jolyn paidalantyn bolsaq, jańadan múmkindikter paida bolady. Osy joldyń joqtyǵynan biz Qara teńiz, Resei arqyly kelip otyratynbyz. Ol qiyn edi. Qazir tikelei jolmen shyǵýǵa múmkinshilik bar, paidalanýymyz kerek», - dedi Memleket basshysy.
Nursultan Nazarbaev Qazaqstan Túrikmenstan, Iran arqyly Parsy shyǵanaǵyna da shyqqanyn aitty.
«Bender-Abbas portynda Qazaqstannyń terminalyn salýdan úmittimiz. Sonymen Kaspii porttarynyń jalpy jyldyq ótkizý qabileti 25 mln tonnaǵa jetti. Olar Qytaidy, Aziianyń basqa memleketterin Jerorta teńizi arqyly Túrkiiamen bailanystyratyn bolady. Bul múmkinshilikterdi Túrkiia kompaniialarynyń qoldanýyna biz ár ýaqytta da múddelimiz. Oǵan barlyq jaǵdai jasaimyz», - dedi Elbasy.
Aita keteiik, Qazaqstan Prezidentimen kezdesýge Túrkiia ekonomikasynyń 15 paiyzyn quraityn 25 kompaniianyń basshylary qatysty. Atalǵan kompaniialar aýyl sharýashylyǵy, tamaq ónerkásibi, geologiia jáne taý-ken óndirý ónerkásibi, himiia ónerkásibi, mashina jasaý, jeńil ónerkásip, densaýlyq saqtaý jáne farmatsevtika salalarynda jumys isteidi.
