Belsendi Talǵat Aiannyń (Aianov) jazasy jeńildetildi, - dep habarlaidy Tengrinews.kz tilshisi qalalyq sottyń baspasóz qyzmetine silteme jasap. Aqtóbe qalalyq № 2 soty Talǵat Aianovtyń bas bostandyǵynan aiyrý úkiminiń ótelmegen jazasyn bas bostandyǵyn shekteý jazasyna almastyrý aryzyn qarastyrdy.
"Sotqa aryz berilgen 2018 jyly 15 naýryzda T.T. Aianov QR Qylmystyq kodeksiniń 73-baby 2-bóligi boiynsha kesilgen jazanyń úshten bir bóligin ótegen. Tártibi durys, jazasyn óteý barysynda bekitilgen tártipti buzbaǵan, tártiptik sharalarǵa tartylmaǵan, qaita jaqsy jaqtarymen kóringen tustary bolǵan. Ol eńbek pen ótkizilgen sharalarǵa belsendi túrde qatynasqan, tártibi birinshi deńgeili jaqsy degen baǵa berligen, jazasyn óteý jeńildetilgen shart boiynsha ótegen. Aqtóbe qalalyq № 2 soty 2018 jyly 13 sáýirde sottalýshynyń aryzyn qanaǵattandyrdy", - delingen sot baspasóz qyzmetiniń habarlamasynda.
Sot málimetinshe, Talǵat Aiannyń ótelmegen merzimi (úsh jyl bir ai jáne 16 kún) bas bostandyǵy shektelý jazasyna aýystyrylyp, probatsionaldyq baqylaýda bolady.
2016 jyly Atyraý qalalyq № 2 soty Talǵat Aiandy QR Qylmystyq kodeksiniń birneshe baptary boiynsha "Áleýmettik, ulttyq, rýlyq, násildik, tektik-toptyq nemese dini alaýyzdyqty qozdyrý", "Kórineý jalǵan aqparat taratý" jáne "Zańsyz jinalys, miting, sherý, piket, demonstratsiia nemese ózge de zańsyz jariia is-shara uiymdastyrý, ótkizý ne olarǵa qatysý, sol siiaqty úi-jai, bailanys quraldaryn, jabdyqtar, kólik berý arqyly osyndai is-sharalardy uiymdastyrýǵa nemese ótkizýge járdem kórsetý, eger bul is-áreketter azamattardyń nemese uiymdardyń quqyqtary men zańdy múddelerine ne qoǵamnyń nemese memlekettiń zańmen qorǵalatyn múddelerine eleýli ziian keltirý" boiynsha sottalǵan.
Talǵat Aian men taǵy bir belsendi Maks Boqaev jalpy rejimdegi koloniiada óteýge bes jylǵa sottalǵan.
