Jankúierler Bokstan álem chempionatynyń kúmis júldegeri Serik Temirjanovty elorda áýejaiynda úlken qurmetpen qarsy aldy. Álemniń vitse-chempiony jýrnalisterge suhbat berip, dúbirli dodany qorytyndylady, sondai-aq, óziniń finalda jeńilýine ne sebep bolǵanyn aitty, dep jazady Olympic.kz.
«Álem chempionatynan altynmen oralamyn dep oilaǵanmyn. Buiyrǵany kúmis boldy. Bul jarys maǵan úlken tájiribe syilady. Dese de, altyn ala almaǵan soń, kóńilim túskeni ras. Óitkeni, kúmis báribir altyn bola almaidy. Árine, bul bastamasy. Munymen toqtap qalmaimyz. Kúmisti altynǵa ainaldyrý úshin bar kúshimizdi salamyz.
Chempionatqa keler bolsam, barlyq qarsylasym qarymdy boldy. Qarsylastarymnyń arasynda osaly joq. Aziia chempiony da, jastar arasyndaǵy álem chempiony da, Panamerika oiyndarynyń jeńimpazy da bar. Sondyqtan, eshkimdi bólip-jarǵym kelmeidi.
Biraq kýbalyq sportshymen ótken kezdesý esimde erekshe qaldy. Óitkeni, ol - Panamerika oiyndarynda top jarǵan óte tájiribeli boksshy. Bapkerlerimmen birge qarsylasty zerttep, jekpe-jek mánerin talqyladyq. Durys taktikamen utyp shyqtyq dep oilaimyn.
Al finalda amerikalyq boksshyǵa azdap jyldamdyǵym ilespei qaldy. Óitkeni, alty kezdesý ótkizgenim baiqaldy. Barymdy saldym, biraq jas ári jyldam eken.
Kópshilik Tokiodaǵy Serik pen qazirgi Seriktiń aiyrmashylyǵyn izdeýde. Olimpiadaǵa qatysty oiyn aityp jatqandar kóp. Negizi, utylǵan adamǵa syltaý kóp. Ár nárseni aita berýge bolady. Tokioda jeńilip qalǵanym ras, ony moiyndaimyn.
Meniń júldem Pavlodar boksynyń tarihyndaǵy alǵashqy medal eken. Bul bastamasy bolsyn dep tileimin. Alda jeńisterimiz kóp bolsyn! Barlyǵy da eńbekpen keldi. Eńbek etemiz», - dedi Temirjanov.
