Belgisiz adamdar Reseidiń Pskov oblysyndaǵy Nevel qalasynda Mánshúk Mámetovanyń eskertkishin qorlaǵan, - dep habarlaidy kaz.tengrinews.kz tilshisi.
Videoda er adam eskertkishke shyǵyp alyp, sýretke túskisi keledi. Al onyń dostary ony sýretke túsirip turyp, bylapyt sózder aitady. Bul video Qaznette taralyp, qoldanýshylardyń ashýyn týǵyzdy.
Osy daýly videoǵa qatysty QR-nyń RF-daǵy elshiliginiń baspasóz qyzmetiniń ókilderi pikir bildirdi.
"QR-nyń Sankt-Peterbýrgtegi Bas Konsýldyǵy Keńes Odaǵynyń Batyry Mánshúk Mámetovanyń Pskov qalasyndaǵy eskertkishin qorlaǵandardy taýyp, jaýapkershilikke tartý boiynsha reseilik quqyq qorǵaý organdaryna habarlasty", - dep habarlady QR-nyń Reseidegi Elshiliginiń baspasóz qyzmetindegiler.
Elshiliktegiler RF Qylmystyq kodeksinde mundai qylmystarǵa qatysty zań baryn jáne osy zańdy buzǵandar jazalanatynyn eske saldy.
Nevel qalasyndaǵy Mánshúk Mámetova eskertkishi. © wikipedia.org
Aita keteiik, Nevel qalasy úshin bolǵan keskilesken sheshýshi urysta Mánshúk Mámetova aqtyq demi bitkenshe pýlemetten oq boratyp, qaharmandyqpen qaza tapqan. Al 2010 jyly osy qalada qazaqtyń batyr qyzyna eskertkish ashylǵan. Bul qalada Mánshúk atynda kósheler de bar.
