Soǵys ardageri, QazTAG qalamgeri Bisultan Amanǵaliev 95 jasqa qaraǵan shaǵynda dúnieden ozdy, dep habarlaidy "Ult aqparat".
Ardager, belgili jýrnalist, jazýshy Bisultan Amanǵaliev QazTAG aýdarma keńsesinde 1954 jyldan 1990 jylǵa deiin jumys istedi. Ol KSRO Jýrnalister odaǵynyń múshesi. QazTAG-qa deiin Bisultan Amanǵaliev «Qazaqstan pioneri» jáne «Sotsialistik Qazaqstan» gazetterinde qalamyn ushtady. Eńbek jolyn aýdarmashy bolýdan bastaǵan ol, aýdarma bóliminiń redaktory, bas redaktordyń orynbasary, respýblikalyq, búkilodaqtyq jáne sheteldik aqparat redaktsiiasyn basqardy.
Ol QazTAG-tyń maitalman mamany, elimizdegi bilikti aýdarmashy retinde arnaiy aldyrylyp, KSRO Joǵarǵy Keńesi sessiialarynda stenografiialyq ilespe aýdarma jasaý úshin birneshe ret Máskeýde de bolǵan. Ásirese, 1969 jyly Máskeýdegi Kremldiń Sezder saraiynda III-Búkilodaqtyq kolhozshylar sezinde tikelei ilespe aýdarma jasaǵan.
Bisultan Amanǵaliev Ýkraina, Polsha, Chehoslovakiia, Vengriiany azat etýge qatysty. Áskerdiń barlyq úsh salasynda qyzmet etti. Ol Qazaqstanǵa 1945 jyldyń qarashasynda ǵana oraldy.
Bisultan Amanǵaliev soǵys jáne beibit ýaqyttaǵy «Qurmet» ordenimen, Halyqtar dostyǵy, Qyzyl Juldyz, Jeńis ordenderimen marapattalǵan. Ardager qalamger 1925 jyly 24 jeltoqsanda qazirgi Batys Qazaqstan oblysy, Kaztalov aýdanynda dúniege kelgen bolatyn.
«Ult aqparat» portalynyń ujymy Bisultan Amanǵalievtiń týǵan-týystaryna kóńil aitady.
