Qazaq jýrnalistikasynyń beldi ókili, «Qazaq gazetteri» JShS-niń bas direktory Jumabek Kenjalin 63 jasqa qaraǵan shaǵynda dúnie saldy.
Kenjalin Jumabek Omaruly 1954 jyly 30 jeltoqsanda Qostanai oblysynyń Amangeldi aýdanyndaǵy «Jańa turmys» kolhozynda týǵan. 1971 jyly Arqalyq aýdanyndaǵy Qaiyndy orta mektebin bitirgen soń, sharýashylyqta jumysshy, elektrmen dánekerleýshi, keiin orta mekteptiń muǵalimi bolyp qyzmet atqardy.
1973 jyldan — 1975 jylǵa deiin Qarýly Kúshter qatarynda qyzmet etti.
1981 jyly S.M.Kirov atyndaǵy Qazaq Memlekettik ýniversitetin oidaǵydai bitirdi. Ol birqatar Dúniejúzilik jáne Búkilodaqtyq jastar men stýdentterdiń forýmdaryna qatysty. 1978 jyly halyq depýtattary Almaty qalalyq sovetiniń depýtattyǵyna sailandy.
1981 jyly «Egemen Qazaqstan» («Sotsialistik Qazaqstan») gazetinde áýeli tilshi, keiin bólim meńgerýshisi, 1986-1988 jyldary «Zerde» («Bilim jáne eńbek») jýrnalynda jaýapty hatshy, bas redaktordyń mindetin atqarýshy, 1994 jyldan «Halyq keńesi» gazetiniń bas redaktory boldy. 1996 jyldan «Aqiqat» jýrnalynyń bas redaktory, 1997-1999 jyldar aralyǵynda «Qazaq ádebieti» gazetiniń bas redaktory qyzmetin atqardy.
1999 jyldan 2007 jylǵa deiin «Qazaq gazetteri» JAQ-nyń prezidenti, bas direktory, «Ana tili» ulttyq aptalyǵynyń, «Aqiqat» ulttyq qoǵamdyq-saiasi jýrnalynyń bas redaktory qyzmetterinde boldy. «Qazaq gazetteri» JShS-nyń Bas direktory – redaktorlar keńesiniń tóraǵasy. Ol 2004 jyly «Buqaralyq aqparat quraldarynyń qazaqstandyq patriotizmdi qalyptastyrýdaǵy róli» degen taqyrypta saiasi ǵylymdarynyń kandidaty ataǵyn alý úshin dissertatsiia qorǵady.
J.O.Kenjalin Qazaqstan Úkimeti janyndaǵy Memlekettik terminologiialyq komissiia múshesi, HVII shaqyrylǵan halyq depýtattary Almaty qalalyq keńesiniń depýtaty bolyp sailandy.
Ol «Jelkildep ósken quraqtai» (1988j.), «Shyndyqty shyraq etip ustańyz» (1998j.), «Ult rýhyn ulyqtaǵan urpaqpyz» (2005j.), «Saiasi menedjment jáne baspasózdiń jurtshylyqpen bailanys máseleleri» (2010j.), «Er Jáýke minbegenmen altyn taqqa» (2011j.) dep atalatyn kitaptardyń avtory.
J.O.Kenjalin – Qazaqstan Respýblikasy Prezidentiniń buqaralyq aqparat quraldary salasyndaǵy syilyǵynyń laýreaty (2006 j.), Qazaqstan Jýrnalister odaǵy syilyǵynyń laýreaty (1983 j), Qazaqstan Jýrnalister Akademiiasynyń tolyq múshesi-akademigi (2001 j), Qazaqstan Respýblikasynyń mádeniet qairatkeri (2004 j.), «Qurmet» ordeniniń (2009j.), Qazaqstan Respýblikasynyń Táýelsizdigine – 20 jyl» medaliniń (2011j.) iegeri, Qazaqstan Jazýshylar odaǵynyń múshesi.
Ómiriniń sońǵy jyldarynda “Qazaq gazetteri” JShS ujymyn basqardy.
Ult portaly ujymy marqumnyń otbasyna, aǵaiyn-týystaryna qaiǵyra kóńil aitady. Aǵamyzdyń jany jánnatta bolsyn!
Jumabek Omarulymen qoshtasý rásimi erteń, iaǵni 25 shilde kúni saǵat 10.00-de Qazaqstan Jazýshylar odaǵynyń ǵimaratynda ótedi (Abylaihan kósh. 105 úi).
