Kórnekti ǵalym-pedagog, tarih ǵylymynyń doktory, professor, QR UǴA akademigi, Qazaqstandaǵy arheologiia ǵylymynyń negizin qalaýshylardyń biri Karl Moldahmetuly Baipaqov dúnie saldy. Bul týraly QR Mádeniet jáne sport ministri Arystanbek Muhamediuly habarlady.
Karl Moldahmetuly Baipaqov 1940 jyly Almaty oblysy Talǵar qalasynda týǵan. Tarih ǵylymynyń doktory, professor, Qazaqstan Ǵylym Akademisynyń akademigi jáne QR Áleýmettik ǵylym akademiiasynyń akademigi (1996), Qazaqstannyń eńbek sińirgen ǵylym jáne tehnika qairatkeri. Leningrad (1964, qazirgi Sankt-Peterbýrg) memlekettik ýniversitetin bitirgen.
Qazaqstan Ǵylym Akademiiasynyń Tarih, arheologiialyq jáne etnologiialyq institýtynda kishi (1966–1971), aǵa ǵylym qyzmetker (1971–1973), bólim meńgerýshisi (1973–1988), arheologiialyq bólim jeteshisi (1988–1991), institýt direktorynyń orynbasary (1991) qyzmetterin atqardy. 1991 jyly Arheologiialyq institýttyń direktory bolyp taǵaiyndaldy. «Ońtústik Qazaqstan men Jetisýdyń ortaǵasyrlyq qala mádenieti (VI–HVIII ǵasyrlar)» degen taqyrypta doktorlyq dissertatsiia qorǵady. Qazaqstannyń ortaǵasyrlyq qalalary tarihyn, qala men dala arasyndaǵy ózara bailanysty zerttep, ǵylymda jańa baǵytty damytty.
Karl Baipaqov birneshe halyqaralyq konferentsiialarǵa qatysty (Drezden, 1984; Vashington, 1986; Tokio, 1988; Parij, 1992; Pekin, 1992). IýNESKO uiymdastyrǵan «Jibek joly» halyqaralyq ekspeditsiiasyna Qazaqstan tarapynan jetekshilik etti (1991). IýNESKO-nyń Ort. Aziia tarihymen ainalysatyn Halyqaralyq ǵylymi komitetti men «Uly Jibek joly» Qazaqstan ulttyq komitetiniń múshesi.
Sondai-aq ol 22 monografiia, 200-den astam ǵylymi maqalanyń avtory. Sh.Sh.Ýálihanov atyndaǵy syilyq laýreaty (1986). «Parasat» ordenimen marapattalǵan.
