Búgin Semei qalasynda belgili abaitanýshy Tóken Ibragimov baqilyq boldy, dep habarlaidy "Ult aqparat".
Belgili jazýshy, synshy, ádebiet pen óner zertteýshisi Tóken Ibragimovtyń qaitys bolǵanyn ózi 34 jyl basqarǵan Abaidyń «Jidebai-Bórili» memlekettik tarihi-mádeni jáne ádebi-memorialdyq qoryq-mýzeiiniń ujymy rastady. Abaitanýshy 78 jasynda ómirden ozdy.
Tóken Smaiyluly Ibragimov burynǵy Semei oblysy, Aqsýat aýdany «Jańa nesip» kolhozynyń Kezeńshilik degen jerinde 1939 jyly 15 aqpanda dúniege kelgen. 1957 jyly orta mektepti bitirgen soń, 1958 jyly Almatydaǵy KAZPI-diń tarih-filologiia fakýltetine túsip, ony 1964 jyly oidaǵydai aiaqtap shyǵady. 1971-1975 jyldary aspirantýrada oqidy. Bolashaq qalamger óziniń eńbek jolyn qarapaiym aýyl jumystarynan bastaidy.
1964-1969 jyldary Jdanov atyndaǵy segiz jyldyq mektepte tárbieshi, qazaq tili men ádebiet jáne tarih pánderiniń muǵalimi, oqý isiniń meńgerýshisi bolyp qyzmet etedi. 1969-1976 jyldary Semei oblystyq televideniesinde ádebiet-drama, mýzykalyq aqparattar redaktsiiasynyń redaktory, aǵa redaktory qyzmetterin atqarady. Alǵashqy eńbekteri stýdenttik jyldary «Leninshil jas», «Ekpindi» gazetterinde, «Juldyz» jýrnalynda jaryq kórgen.
1996 jyly «Qazaqstanǵa eńbegi sińgen qyzmetkeri» ataǵy berildi, 1998 jyly «Qurmet» ordenimen marapattaldy. Jurtshylyqqa uly Abai murasy, jalpy qazaq poeziiasy, mádenieti jaily zertteý eńbekteri arqyly keńinen tanymal qalamger «Óleń órisi» (1979 j.), 1999 jyly «Oimen ońasha» atty poeziiasy, «Indiraǵa hat», «Tolqyn tolǵaý» (2001 j.) monografiiasynyń, «Saǵynysh», «Qara buzaý», «Sary qus» áńgimeleriniń, «Jaza» operasynyń librettosy t.b. eki júzden astam ádebi-syn, ádebi zertteý, abaitanýǵa qatysty tolaǵai týyndylardyń avtory. Sonymen qatar, «Kúi álemi», «Tolqyn tolǵaý», «Án ólkesi» atty kitaptary halqymyzdyń keshegi án-kúi qazynasy men búgingi kúishilik-oryndaýshylyq óneriniń sheberlik máselelerin qozǵaidy.
Ol 1976 jyldyń 12-sáýirinen kúni búginge deiin Abai qoryq murajaiynyń shyraqshysy bolyp keldi.
