Búgin Belarýste jańa konstitýtsiia qabyldaý jóninde referendým ótip jatyr. Konstitýtsiianyń bul nusqasyn 2020 jyly prezident sailaýynan keiin jappai qarsylyq paida bolyp, kúshpen basylǵan soń Aleksandr Lýkashenko jasaǵan.
Azattyq radiosynyń habarlaýynsha konstitýtsiiaǵa jańa ózgerister engizilgennen keiin bul eldi 1994 jyldan beri basqaryp kele jatqan Aleksandr Lýkashenko 2035 jylǵa deiin taǵy da bilikte qala alady.
Lýkashenko taǵaiyndaǵan adamdardan ǵana quralatyn Jalpybelarýs halyqtyq jiynynyń ókiletin keńeite túsedi.
Jańa konstitýtsiia boiynsha keiingi 20 jylda shetelde turǵan Belarýs azamattary prezident sailaýyna túse almaidy. Bul ózgeris kóp jyldan shetelde turatyn Belarýs oppozitsionerlerine baǵyttalǵan.
Resmi málimetke qaraǵanda elektorattyń teń jarysy túske deiin kelip daýys bergen. Bul eldegi sailaýlar zań buzýmen ótedi dep esepteitin táýelsiz baqylaýshylar referendým da solai bolady dep sanaidy.
Referendým kúni Ýkraina prezidenti Vladimir Zelenskii Belarýs halqyna orys tilinde úndeý jasap, belorýs jerinen Ýkrainaǵa Resei áskeri oq atyp jatqanyn aitty. Ol belorýstardy bul jaitqa únsiz qalmaýǵa shaqyryp, "Belarýs bolyńyzdar, Resei emes" dedi.
Zelenskii Reseimen kelissózge daiyn ekenin, biraq kelissóz agressiiaǵa qatysyp otyrǵan Belarýstan ózge jerde ótýge tiistigin málimdedi.
Lýkashenko Zelenskiidiń úndeýine tez jaýap berip, belorýstarǵa emes, ýkraindarǵa úndeý jasaý jóninde keńes berdi.
"Belarýs jerinen eshkim soǵys ashyp jatqan joq", – degen ol Ýkraina Belarýsty óz azamattaryn qorǵaýǵa arnalǵan arnaýly operatsiiaǵa itermelegisi keledi degendi meńzedi. Lýkashenko belorýs jerinen Ýkrainaǵa qarata "eki-úsh zymyran atylǵanyn" moiyndady.
Lýkashenko Belarýs Reseidiń jaraly jaýyngerlerin emdeýge kómektesip jatqanyn aitty. Buǵan deiin Azattyq radiosynyń Belarýs qyzmeti Resei soldattarynyń Gomeldegi gospitalge túskenin habarlaǵan. Resei qorǵanys ministrligi jaralanǵandar men ólgender týraly aqparat jariialamaǵan.
Buǵan deiin Reseidiń 30 myńǵa jýyq áskeri qyzmetkeri jattyǵý degen jeleýmen Belarýs jerine kelgen edi. Onyń bir bóligi Reseidiń Ýkrainaǵa shabýylyna qatysyp jatyr.
