Belarýs oppozitsiiasy jetekshileriniń biri Mariia Kolesnikova týraly qarama-qaishy aqparat tarady. Belarýs shekara qyzmeti Kolesnikova shekaradan ótip, Ýkrainaǵa ketti dese, Ýkrainanyń resmi oryndary bul aqparatty joqqa shyǵardy.
Ýkraina shekara qyzmetiniń habarlaýynsha, shekaradan eki oppozitsiialyq belsendi Anton Rodnenkov jáne Ivan Kravtsov ótken. Qupiia derekkózge súiengen "Interfaks-Ýkraina" agenttiginiń jazýynsha, Kolesnikovany qaýipsizdik kúshteri elden kúshpen shyǵarýǵa tyrysqanmen ol pasportyn jyrtyp tastap, qalyp qoiǵan. Bul aqparatty Ýkrainanyń ishki ister vitse-ministri Anton Gerashenkonyń sózine súiengen Mash Telegram-arnasy da jazdy.
Buǵan deiin úsh oppozitsiialyq belsendi Mariia Kolesnikova, Anton Rodnenkov jáne Ivan Kravtsov iz-túzsiz joǵalyp ketip, jaqtastary olardy bir aidan astam ýaqyttan beri ótip jatqan prezident Aleksandr Lýkashenkoǵa narazylyq sharasyn basý úshin qaýipsizdik kúshteri ustaǵan bolýy múmkin dep boljaǵan edi. Úsheýi de bilikti beibit jolmen aýystyrýdy kózdeitin oppozitsiia qurǵan úilestirý keńesine múshe.
Belarýs shekara qyzmetiniń ókili Anton Bichkýski buǵan deiin Azattyqtyń Belarýs qyzmetine olardyń elden shyǵyp ketkenin aitqan edi.
Bir kún buryn kýágerler sózine súiengen Tut.by saity Minsk ortalyǵynda belgisiz bireýlerdiń Kolesnikovany mikroavtobýsqa otyrǵyzyp, kúshpen alyp ketkenin habarlaǵan bolatyn.
Belarýste oppozitsiia jetekshileri joǵalyp ketkennen keiin bilikke qysym kúsheigen. Eýroodaq Belarýs rejimin tórt aptadan astam ýaqyttan beri ótip jatqan narazylyqty basý úshin "adam urlaý" men "qorqytý sharalaryn" qoldandy dep aiyptady.
Narazylyq kezinde myńdaǵan adam ustalǵan, tergeý izoliatoryna qamalǵandar ózderin uryp-soǵyp, azaptaǵanyn aitqan. Kóptegen aqparat quraldary elden shyǵaryldy. Sailaýǵa oppozitsiia atynan qatysqan kandidat Svetlana Tihanovskaia biliktiń qysymymen elden ketken. Ol 8 qyrkúiekte Eýropa Keńesi parlamenttik assambleiasynyń (PASE) saiasi ister jáne demokratiia jónindegi komitet otyrysynda Belarýstegi jaǵdai boiynsha baiandama jasaidy. Ol sonymen birge osy aptada Varshavada Polshanyń resmi ókilderimen kezdespek. Belarýsti 26 jyl basqarǵan Lýkashenko buǵan deiin qarsylastarymen dialog ornatýdan bas tartyp, jańa sailaý ótkizbeitinin aitqan.
