Minsk turǵyny Stepan Latypov sot zalynda qalammen óziniń tamaǵyn jaralady. Ol osynyń aldynda qylmysyn moiyndamasa, quqyq qorǵaý organ ókilderi týystarynyń ústinen is qozǵaitynyn aityp qorqytqanyn jetkizgen. Bul týraly "Vesna" quqyq qorǵaý ortalyǵy habarlady.
Latypov "iri alaiaqtyq jasady", "qoǵam tártibin buzdy" jáne "militsiiaǵa baǵynbady" dep aiyptalyp otyr. Ol byltyr tamyz aiyndaǵy prezident sailaýynyń nátijesine qarsylyq bildirgen belsendilerdiń biri.
Byltyr qyrkúiek aiynda ustalǵannan keiin Belarýs memlekettik telearnalary belsendiniń militsiia qyzmetkerlerin ýlaý maqsatynda shetelden himikat tasyǵandyǵy jaily siýjetter kórsetti. Qylmystyq iske bul epizod kirmegen.
Seisenbi kúngi sot otyrysy kezinde Latypov 51 kúnnen beri "press-hatada" (túrme ákimshiligi ózine unamaǵan tutqyndardy azaptaý úshin osyndai kameralardy paidalanady) jatqanyn aitady. Azattyqtyń Belorýs qyzmetiniń habarlaýynsha, sot zalyndaǵy kamerada otyrǵan ol ózine kúzetshiler qoly jetpeitindei aralyqta turyp, qalamdy tamaǵyna suqqan. Saqshylar tordy jyldam asha almaǵan, sebebi sot pristavynda kilt bolmai qalǵan.
- Minsk men Belarýstiń ózge iri qalalarynda shamamen jarty jyldan beri jappai narazylyq jalǵasyp keledi. Narazylar Aleksandr Lýkashenko altynshy ret jeńimpaz dep jariialanǵan prezident sailaýynyń resmi nátijesin joiýdy talap etedi.
- Bilik narazylyqty aýiasyz basyp-janshydy. Ondaǵan myń adam ustalyp, myńdaǵan adam qamaldy. Olarǵa túrli qylmys boiynsha aiyp taǵyldy.
- Batys elderi prezident sailaýynyń resmi nátijesin moiyndamai, Lýkashenkony el prezidenti retinde tanyǵan joq. Vashington ony oppozitsiiamen dialog ornatyp, jańadan sailaý ótkizýge shaqyrǵan.
- Azattyq
