Belarýs politsiiasy Aleksandr Lýkashenkonyń bilikten ketýin, jańa sailaý ótkizýdi talap etip narazylyqqa shyqqan ondaǵan adamdy qamaýǵa aldy.
"Vesna" quqyq qorǵaý uiymy Minsk, Gomel, Grodno jáne Mogilev qalalarynda 15 qarashada 179 adamnyń ustalǵanyn habarlady.
El astanasy Minskidegi Pýshkinskaia metro stansasynyń qasyna 15 qarashada birneshe myń adam jinaldy. Politsiia jinalǵandardy taratý úshin jas aǵyzatyn gaz ben qulaq tundyratyn granata qoldandy.
Demonstranttar Belarýstegi saiasi oppozitsiianyń simvolyna ainalǵan aq-qyzyl-aq jolaqty jalaýlar ustap, "Lýkashenko! Tribýnal!" "Jasa, Belarýs!" degen urandar aityp aiqailady.
Mobildi internet bailanysy tańǵy 9-dan bastap óshirilip, Minskidegi 10 metro stansasy jabyldy.
Minsk turǵyndary Azattyq tilshilerine qalanyń túrli bólikterinde áskeri adamdar mingen áskeri tehnika, avtobýstar jáne avtozaktar jinalyp turǵanyn aitty. TUT.BY portaly "qalada jai júrginshiden góri kúsh qurylymdarynyń ókilderi kóp" dep jazdy. Vitebsk jáne Bobrýisk qalalarynda da "qara kigen adamdar" jinaldy degen aqparat bar.
Belarýste 15 qarashada oppozitsiialyq kózqarastaǵy belsendi Roman Bondarenkony eske alý qurmetine "Batyldar marshy" ótip jatyr. 12 qarashada 31 jastaǵy Minsk turǵyny jansaqtaý bóliminde qaitys boldy. Belgisiz bireýler ony úiiniń aýlasynan ustap alyp ketip, ortalyq ishki ister bólimine alyp barǵan, eki saǵattan soń ol aýyr jaǵdaida jedel járdem aýrýhanasyna jetkizilgen. Eýropa odaǵyndaǵylar Bondarenkonyń qazasyna bailanysty Belarýsqa qosymsha sanktsiia salýdy oilastyratynyn málimdedi.
Tamyzda ótken prezident sailaýyna oppozitsiia atynan qatysqan Svetlana Tihanovskaia 15 qarashadaǵy demonstranttarǵa jasalǵan áreketterdi "joiqyn" shabýyl dep atady jáne halyqaralyq qoǵamdastyqtan narazy jurtqa arasha túsýdi surady.
"Odaqtastarymyzdy Belarýs halqy men adam quqyqtaryn qoldaýǵa shaqyramyz. Biz jaralanǵandarǵa gýmanitarlyq dáliz uiymdastyrýdy, aqparat quraldaryna kómektesýdi jáne qylmysty halyqaralyq deńgeide tergeýdi suraimyz" dep jazdy ol Twitter-degi paraqshasynda.
Tihanovskaia jeke basy men otbasyna qaýip tóngendikten, 9 tamyzdaǵy sailaýdan keiin Litvaǵa ketip qalǵan.
Aleksandr Lýkashenko sailaýda jeńiske jetkenin jariialaǵan. Biraq AQSh pen Eýroodaq sailaý nátijesin moiyndaýdan bas tartty. Eýroodaq Lýkashenkodan bastap, Belarýs úkimetindegi basqa da laýazymdy adamdarǵa sanktsiia saldy. Tamyzdan beri oǵan qarsy narazylyq sharalary kún saiyn derlik ótkiziledi.
