Belarýs oppozitsiiasy bilikti beibit aýystyrýdy júzege asyratyn úilestirý keńesin qurdy. Prezident Aleksandr Lýkashenko oppozitsiianyń bul qadamyn “bilikti basyp alý talpynysy” dep atady.
Azamattyq qoǵam ókilderinen quralǵan oppozitsiialyq keńes 18 tamyzda baspasóz máslihatyn ótkizip, bilikti beibit aýystyrý boiynsha kelissóz júrgizýge talpynatynyn aitty. Tihanovskaianyń senimdi ókili Olga Kovalkova elden ketýge májbúr bolǵan Tihanovskaianyń jaqyn arada Minskige oralyp, bilikti aýystyrý kelissózine kepil retinde qatysýy múmkin ekenin jetkizdi.
9 tamyzda ótken prezident sailaýynda ózin jeńiske jettim dep sanaityn oppozitsiia kandidaty Svetlana Tihanovskaia buǵan deiin videomálimdeme taratyp, "eldegi jaǵdaidy qalpyna keltirý úshin" ult kóshbasshysy bolýǵa daiyn ekenin málimdegen bolatyn.
Prezident Lýkashenko oppozitsiianyń áreketin "memlekettik tóńkeris jasaý talpynysy" dep atap, oǵan "ókpeliler" men "natsister" kirgenin, tizimge engenderge "aqylǵa qonymdy shara" qoldanatynyn eskertti.
Al keńes ókilderi Lýkashenkonyń "bilikti basyp alýǵa tyrysyp jatyr" degen aiyptaýyn joqqa shyǵaryp, joǵary bilikti oppozitsiiamen dialog ornatýǵa úndedi. Lýkashenko dialogtan bas tartsa, ózge laýazymdy tulǵalarmen daǵdarystan shyǵý máselesin talqylaimyz dedi.
Úilestirý keńesine shamamen 30 adam múshe. Olardyń arasynda Tihanovskaia shtabynyń basshysy Mariia Kolesnikova, "Vesna" quqyq qorǵaý ortalyǵynyń tóraǵasy Ales Beliatskii jáne ádebiet salasy boiynsha Nobel syilyǵynyń laýreaty, jazýshy Svetlana Aleksievich te bar.
Belarýste oppozitsiia prezident sailaýynyń resmi qorytyndysyn moiyndaýdan bas tartqannan keiin elde saiasi daǵdarys ýshyqqan. Ortalyq sailaý komissiiasy qazirgi basshy Aleksandr Lýkashenko jeńiske jetti dep jariialaǵan. Oppozitsiia sailaý qorytyndysy burmalandy dep sanaidy. Lýkashenkonyń otstavkasyn talap etken narazylyq sharalary eldiń túrli qalalarynda jalǵasyp jatyr.
