Belarýs memleketi Qazaqstanmen birge taǵy birneshe elden munaidy shikizat retinde alyp, óz zaýyttarynda óńdep almaq. Bul týraly Energetika vitse-ministri Áset Maǵaýov aitty, dep habarlaidy QazAqparat.
«Belarýs daiyn munai ónimderinen buryn ózderi óńdep alatyndai munai, gazoil sekildi shikizatqa kóbirek qyzyǵyp otyr. Olar osylaisha, shikizatty óz zaýyttarynda paidalanyp, daiyn ónimge ie bolmaq. Sol sebepti, meniń oiymsha, olar bizdiń benzinge qyzyǵyp otyrǵan joq. Kelissózderde jariialanǵan suranys kólemi shamamen 3,2 mln tonna. Ony tasymaldaýdyń túrli nusqalary qaralý ústinde. Qazir jalpy suraqtar boiynsha ortaq mámilege keldik. Endi memleket ishindegi protsedýralardan ótkennen keiin ózge ministrlikterdiń maquldaýyn alýymyz kerek. Ǵylymi-quqyqtyq, investitsiialyq saraptama jasalýy tiis. Sodan keiin ǵana eksportqa shyǵa alamyz», - dedi Áset Maǵaýov búgin Úkimet úiinde ótken baspasóz máslihatynda.
Vitse-ministr Belarýs tarapymen eksport kólemi boiynsha kelisimge kelgennen keiin ǵana shikizat qai baǵyt arqyly tasymaldanatyny talqylanatynyn aityp ótti.
«Reseilik áriptesterimizben de sol kezde sóilesemiz. Al Resei tarapy buǵan qarsy degendi estimeppin. Meniń bilýimshe, Qazaqstan tarapynan da, Belarýs tarapynan da ondai usynys túspegeni aitylǵan bolatyn. Barlyq saraptama aiaqtalǵannan keiin Ádilet jáne Syrtqy ister ministrlikteriniń ruqsatyn alý qajet. Belarýs tarapy surap otyrǵan eksport kólemin qamtamasyz etý úshin birqatar erejege ózgeris engizý kerek. Belarýs Qazaqstannan ózge elderge de satatyn kólemdegi munaidy alǵysy keledi. Mundai kólemdegi munai úshin kedendik eksport salyǵy alynady. Bul bizdiń biýdjetke qosymsha shyǵyn. Sondyqtan, biz Belarýs jaǵyna ónimdi taratý kelisimi boiynsha kelissózder júrgizýdi usyndyq. Ózderi suraǵan munaidy Qazaqstannan kedendik eksport salyǵy salynbai shyǵarylatyn ónim retinde satyp alsa ǵana biz úshin barynsha shyǵynsyz bolar edi», - dedi ol.
Áset Maǵaýov eger Belarýs tarapymen baǵa men marketing strategiiasy boiynsha kelisimge qol jetkizilse, Qazaqstan atalmysh kólemdegi munaidy keste boiynsha jetkizýge daiyn ekenin atap ótti.
«Demek, barlyǵy kompaniialarmen kelissóz júrgizý nátijesine bailanysty. Meniń oiymsha, barlyq protsedýradan sátti ótsek, iaǵni qosymsha maquldaýdy qajet etetin basqa memlekettik organdar tarapynan kútpegen eskertýler bolmasa, keler jyldyń basynda kelisimge qol qoiylýy múmkin», - dedi Áset Maǵaýov.
