Belarýs tergeý komiteti Nexta telegram-arnasynyń avtorlary Stepan Pýtilo men Roman Protasevichti "jappai tártipsizdik uiymdastyrdy" dep aiyptady. Bul aqparatty tergeý komiteti habarlamasyna súiengen Belarýstyń memlekettik agenttigi BelTA habarlady.
Pýtilo men Protasevichke izdeý jariialanǵan. Olarǵa "bilik ókilderi men quqyq qorǵaý organ qyzmetkerlerine teris pikir qalyptastyrdy" dep te aiyp taǵylǵan.
Tergeý organdary prezident sailaýynan keiin bastalǵan jappai narazylyqqa bailanysty qozǵalǵan qylmystyq is aiasynda blogerlerge aiyp taǵyp otyr.
Osyǵan deiin Nexta arnasy elde "ekstremistik" dep tanylǵan. Telegram-arna sailaý qorytyndysynyń burmalanǵanyna qarsy shyqqan demonstranttar sherýinen úzdiksiz habar taratyp, Lýkashenko rejimine qatysty syni aqparat jariialap keledi.
Nexta Live arnasynyń shamamen 2 mln jazylýshysy bar. Tamyz aiynda Belarýsta narazylyq aktsiiasy bastalǵannan keiin kanal erekshe tanymal bola bastaǵan.
"Nehta" sózi belarýs tilinen aýdarǵanda "áldekim" degen maǵynany bildiredi. Arnany 22 jastaǵy bloger Stepan Pýtilo ashqan. Qazir ol Varshavada turady. 2018 jyly Youtube-te rolik jariialap, "prezidenttiń namysyna tiiý" baby boiynsha qylmystyq qýdalaýǵa ushyraǵan Pýtilo elden ketken edi.
Pýtilo men arnanyń ózge de ákimshisi jaily tanymal videobloger Iýrii Dýd siýjet jasaǵan. Reseilik oppozitsiialyq saiasatker Aleksei Navalnyi birneshe kún buryn Nexta arnasynyń suraqtaryna jaýap bergen.
