بەلارۋس تەرگەۋ كوميتەتٸ Nexta تەلەگرام-ارناسىنىڭ اۆتورلارى ستەپان پۋتيلو مەن رومان پروتاسەۆيچتٸ "جاپپاي تەرتٸپسٸزدٸك ۇيىمداستىردى" دەپ ايىپتادى. بۇل اقپاراتتى تەرگەۋ كوميتەتٸ حابارلاماسىنا سٷيەنگەن بەلارۋستىڭ مەملەكەتتٸك اگەنتتٸگٸ بەلتا حابارلادى.
پۋتيلو مەن پروتاسەۆيچكە ٸزدەۋ جارييالانعان. ولارعا "بيلٸك ٶكٸلدەرٸ مەن قۇقىق قورعاۋ ورگان قىزمەتكەرلەرٸنە تەرٸس پٸكٸر قالىپتاستىردى" دەپ تە ايىپ تاعىلعان.
تەرگەۋ ورگاندارى پرەزيدەنت سايلاۋىنان كەيٸن باستالعان جاپپاي نارازىلىققا بايلانىستى قوزعالعان قىلمىستىق ٸس اياسىندا بلوگەرلەرگە ايىپ تاعىپ وتىر.
وسىعان دەيٸن Nexta ارناسى ەلدە "ەكسترەميستٸك" دەپ تانىلعان. تەلەگرام-ارنا سايلاۋ قورىتىندىسىنىڭ بۇرمالانعانىنا قارسى شىققان دەمونسترانتتار شەرۋٸنەن ٷزدٸكسٸز حابار تاراتىپ, لۋكاشەنكو رەجيمٸنە قاتىستى سىني اقپارات جارييالاپ كەلەدٸ.
Nexta Live ارناسىنىڭ شامامەن 2 ملن جازىلۋشىسى بار. تامىز ايىندا بەلارۋستا نارازىلىق اكتسيياسى باستالعاننان كەيٸن كانال ەرەكشە تانىمال بولا باستاعان.
"نەحتا" سٶزٸ بەلارۋس تٸلٸنەن اۋدارعاندا "ەلدەكٸم" دەگەن ماعىنانى بٸلدٸرەدٸ. ارنانى 22 جاستاعى بلوگەر ستەپان پۋتيلو اشقان. قازٸر ول ۆارشاۆادا تۇرادى. 2018 جىلى Youtube-تە روليك جارييالاپ, "پرەزيدەنتتٸڭ نامىسىنا تييۋ" بابى بويىنشا قىلمىستىق قۋدالاۋعا ۇشىراعان پۋتيلو ەلدەن كەتكەن ەدٸ.
پۋتيلو مەن ارنانىڭ ٶزگە دە ەكٸمشٸسٸ جايلى تانىمال ۆيدەوبلوگەر يۋريي دۋد سيۋجەت جاساعان. رەسەيلٸك وپپوزيتسييالىق ساياساتكەر الەكسەي ناۆالنىي بٸرنەشە كٷن بۇرىن Nexta ارناسىنىڭ سۇراقتارىنا جاۋاپ بەرگەن.
