Jemqorlardy merziminen buryn bosatpaý týraly zań normasy qai sanattaǵy sottalýshylarǵa qoldanylmaidy? Bul sanat jaily tolyǵyraq QR Sybailas jemqorlyqqa qarsy is-qimyl agenttigi tóraǵasynyń orynbasary Oljas Bektenov aityp berdi, dep habarlaidy QazAqparat.
Eske sala ketsek, jaqynda Memleket basshysy Qasym-Jomart Toqaev «Qazaqstan Respýblikasynyń keibir zańnamalyq aktilerine qylmystyq protseste azamattardyń quqyqtaryn qorǵaýdy jáne sybailas jemqorlyqqa qarsy is-qimyldy kúsheitý máseleleri boiynsha ózgerister men tolyqtyrýlar engizý týraly» Qazaqstan Respýblikasynyń Zańyna qol qoiǵan bolatyn.
OKQ-daǵy baspasóz máslihatynda Oljas Bektenov bul zań arqyly jemqorlyqtyń aýyr jáne asa aýyr túri boiynsha sottalǵan adamdardy shartty túrde ýaqytynan buryn bosatýǵa tyiym salynǵanyn atap ótti.
«Tek eki adamǵa zańnyń bul normasy qoldanylmaidy: birinshiden, bul qylmysty áleýmettik az qamtylǵan sanattaǵy jekelegen azamattary jasasa, ekinshiden sottalýshy protsessýaldyq kelisimniń barlyq sharttaryn oryndaǵan jaǵdaida. Keltirilgen shyǵyndy tolyq qalpyna keltirse, jaza merzimi barysynda mindetti tólemi ótelse – atalǵan sanattaǵy azamattar jazanyń belgili bir bóligin ótegennen keiin shartty túrde ýaqytynan buryn bosatylýy múmkin. Qalǵan jaǵdailarda jemqorlyqtyń aýyr jáne asa aýyr túri boiynsha sottalǵan adamdar shartty túrde ýaqytynan buryn bosatylmaidy», - dedi Oljas Bektenov.
Onyń aitýynsha, jemqorlyqtyń aýyr jáne asa aýyr túrin jasaǵan azamattar sot belgilegen merzimdi tolyǵymen óteitinin málimdedi.
«Bul jaza jemqorlyqtyń aldyn alýǵa sebep bolar degen senimdemiz. Árbir adam oilanýy kerek» - deidi ol.
